Në zemër të Romës: Begaj dhe Mattarella takojnë krerët arbëreshe dhe lartësojnë lidhjen e fortë shqiptaro-italiane

Kreu i shtetit të Shqipërisë, Bajram Begaj, së bashku me homologun e tij italian, Sergio Mattarella, zhvilluan një pritje zyrtare në Pallatin Quirinale në Romë, ku mikpritën krerët e të gjitha bashkive arbëreshe të vendit fqinj, në një ngjarje që i dha zë rrënjëve të thella historike dhe kulturore mes dy kombeve. Gjatë fjalës së mbajtur në këtë organizim, Presidenti Begaj e cilësoi popullsinë arbëreshe si një dëshmi të gjallë të miqësisë vëllazërore midis Shqipërisë dhe Italisë, duke vënë në pah faktin se ata kanë përcjellë ndër shekuj – për më shumë se pesë qindra vjet – gjuhën e të parëve, zakonet dhe trashëgiminë e tyre kulturore. “Miqësitë mes shteteve mund të ndërtohen nga interesat e përbashkëta, ndërsa vëllazëria lind nga historia, nga kujtesa, lind nga lidhjet njerëzore. Ju, të dashur arbëreshë, jeni themeli i kësaj vëllazërie”, u shpreh Presidenti shqiptar gjatë fjalës së tij. Me këtë rast, Presidenti shqiptar shprehu mirënjohjen e thellë ndaj numrit një të shtetit italian, Sergio Mattarella, për angazhimin e treguar në pritjen e këtij delegacioni, duke e quajtur një mik të çmuar të Tiranës zyrtare dhe një mbështetës të palëkundur të rrugëtimit tonë integrues drejt Bashkimit Evropian. “Takimi ynë i sotëm është shumë më tepër sesa një ngjarje protokollare; është dëshmi e gjallë e miqësisë së veçantë ndërmjet Shqipërisë dhe Italisë, një miqësi që i ka rrënjët e thella historike, por që mbetet po aq e fuqishme dhe frymëzuese në kohë moderne”, deklaroi ai ndër të tjera. Në vijim, kreu i shtetit vlerësoi lart partneritetin strategjik dhe rolin e Italisë si një aleate e besueshme, e cila ka qenë gjithmonë krah Shqipërisë në sfidat e saj madhore dhe në aspiratën për t’u bërë pjesë e familjes së madhe evropiane. Një fokus të veçantë në fjalimin e tij, Begaj ia kushtoi kontributit të pazëvendësueshëm të arbëresheve dhe komunitetit të ri shqiptar në Itali, duke e cilësuar bashkimin e tyre si një model se si integrimi i suksesshëm në shoqërinë pritëse nuk e cënon aspak ruajtjen e identitetit kombëtar dhe origjinës. “Sot, krahas komunitetit historik arbëresh, qëndron edhe komuniteti i ri i shqiptarëve, që prej dekadash jetojnë, studiojnë, punojnë dhe ndërtojnë të ardhmen e tyre në Itali. Ata janë bërë pjesë e rëndësishme e jetës ekonomike, shoqërore, akademike dhe kulturore italiane”, tha Begaj. Sipas tij, pavarësisht se i ndajnë shekuj historie, këto dy grupe njerëzish përfaqësojnë të njëjtat vlera të punës, kontributit qytetar dhe lidhjes së pashkëputur me vendin e të parëve. “Në një Evropë që përballet me sfida të shumta, përvoja e arbëreshëve dhe e shqiptarëve të sotëm në Itali përcjell një mesazh me shumë vlerë: integrimi dhe ruajtja e identitetit nuk e përjashtojnë njëra-tjetrën. Përkundrazi, ato mund ta pasurojnë shoqërinë dhe të forcojnë mirëkuptimin mes popujve”, theksoi Presidenti. Kreu i Shtetit përsëriti gjithashtu rëndësinë e bashkëpunimit dypalësh nën ombrellën e NATO-s dhe shprehu bindjen se e ardhmja e përbashkët e të dyja vendeve do të jetë brenda Bashkimit Evropian, si një objektiv parësor për Shqipërinë. Në mbyllje të fjalës së tij, ai u drejtoi një thirrje të ngrohtë kryetarëve të komunave arbëreshe që të vazhdojnë misionin e tyre fisnik për t'ua trashëguar fëmijëve dhe gjeneratave të reja traditat, gjuhën dhe shpirtin arbëresh. “Bëjini të rinjtë të dashurohen me këtë traditë!”, ishte mesazhi i tij përmbyllës. Në përfundim të këtij takimi, dy liderët, Begaj dhe Mattarella, shkëmbyen dekorata zyrtare si shenjë e vlerësimit të lartë për angazhimin e tyre në mirëqenien, miqësinë dhe aleancën e qëndrueshme mes dy shteteve.