A e veshin fanellën e Kosovës? Franco Foda tregon bisedat me Dalipin dhe Ibrahimovicin

Kryetrajneri i Përfaqësueses së Kosovës, Franco Foda, ka konfirmuar zyrtarisht se po mban kontakte të vazhdueshme me dy futbollistët e rinj me perspektivë, Lutfi Dalipi dhe Arijon Ibrahimovic, duke shprehur besimin se ata në fund do t'i bashkohen 'Dardanëve'. Gjatë paraqitjes së tij para gazetarëve, strategu gjerman u ndal te situata e sulmuesit të skuadrës së Vaduzit, Lutfi Dalipi, i cili nuk e ka dhënë ende fjalën e tij përfundimtare për kombëtaren që do të përfaqësojë në arenën ndërkombëtare. “Po, kam pasur kontakte me Lutfi Dalipin. Kam biseduar me të. Ai ende nuk ka vendosur se kë të përfaqësojë. Të shohim, shpresoj që të vendosë për Kosovën”, u shpreh Foda në konferencën për shtyp. Ndërkohë, kreu i stafit teknik të Kosovës dha detaje edhe rreth bisedave me talentin e Augsburgut, Arijon Ibrahimovic, i cili ka mundësinë ligjore të luajë si për Gjermaninë ashtu edhe për Kosovën. “Po, kam biseduar edhe me të, por do të jetë zgjedhja e tij nëse do të luajë për Kosovën. Ai ka të drejtë të luajë për Gjermaninë dhe Kosovën. Kemi biseduar disa herë dhe shpresoj që në fund të zgjedhë Kosovën”, shtoi më tej ai. Në fjalën e tij, trajneri gjerman tregoi gjithashtu se vijon me përkushtim monitorimin e kampionatit vendor, duke u shfaqur rregullisht në stadiumet e vendit për të skanuar elementët cilësorë që mund t'i shërbejnë kombëtares. “Po, i përcjell ndeshjet e Superligës së Kosovës. Shkoj dhe i shikoj lojtarët, shpesh diskutoj edhe me presidentët e klubeve kosovare. Kemi parë që këtë edicion Prishtina, Malisheva dhe Drita po kalojnë një formë të lartë”, përfundoi Foda.