Kërcënim me armë brenda Ministrisë së Ekonomisë: Zyrtari vihet në ndjekje të eprorit të tij pas një konflikti pune

Një konflikt verbal lidhur me një komision disiplinor ka degjeneruar në kërcënim me armë zjarri brenda ambienteve të Ministrisë së Ekonomisë. Ngjarja e rëndë dyshohet të ketë ndodhur të hënën, ku zyrtari i kësaj ministrie, Sami Shaqiri, thuhet se ka kanosur eprorin e tij, Dardan Bujupin. Zanafilla e këtij incidenti dyshohet të ketë qenë një mosmarrëveshje rreth përbërjes së një komisioni disiplinor, ku bënte pjesë Shaqiri. Tensionet u ngritën pasi Bujupi nuk pranoi të merrte pjesë në këtë komision, duke argumentuar se pozita e tij si epror nuk e lejonte një gjë të tillë. Kriza mes tyre kishte nisur fillimisht në rrugë digjitale, kur Shaqiri i kishte dërguar një e-mail Bujupit, duke i kërkuar plotësimin e një formular. Përgjigjja e Bujupit kishte qenë që formulari të plotësohej nga vetë vartësi dhe më pas t'i paraqitej atij për nënshkrim. Situata ka marrë kthesë alarmante kur, pas kësaj mosmarrëveshjeje, Shaqiri dyshohet se është vënë në ndjekje të Bujupit, duke e ndjekur hap pas hapi deri në tualetin e ministrisë, ku edhe φohet se e ka kërcënuar me armë. Pas këtij incidenti të pazakontë, zyrtari në fjalë dyshohet se është shoqëruar dhe arrestuar nga autoritetet. Megjithatë, konfirmimi zyrtar i detajuar dhe rrethanat e plota të ngjarjes pritet të jepen së shpejti nga Policia e Kosovës.