Vizita e fshehtë e Listës Studentore serbe në Kosovë ndez debatin: A kishte miratimin e institucioneve?

Vetëm pak ditë pas përfundimit të zgjedhjeve në Serbi, një delegacion i përfaqësuesve politikë të Listës Studentore ka realizuar një vizitë në territorin e Kosovës, gjatë së cilës kanë zhvilluar takime me krerët e institucioneve ortodokse serbe. Kjo vizitë, e cila u mbajt pa ndonjë paralajmërim paraprak apo njoftim zyrtar nga institucionet e Kosovës, ka shkaktuar reagime të shumta dhe shqetësim në opinionin publik vendës. Zhvillimi i kësaj vizite nga ana e subjektit politik që doli fitues në zgjedhjet serbe ka marrë vëmendjen e ekspertëve të sigurisë, të cilët kanë dhënë analizat dhe vlerësimet e tyre mbi këtë ngjarje. Eksperti i sigurisë, Hysen Gecaj, ka theksuar se ky udhëtim shërben si dëshmi e qartë se brezat e rinj në Serbi e kanë jashtëzakonisht të vështirë të çlirohen nga ideologjia nacionaliste. “Pikërisht kjo vizitë është tregues që qartë na thotë se ai nacionalizëm që është ngulitur për vite të tëra te populli serb, ka depërtuar edhe te rinia dhe kjo rini ende e ka atë frymë që nuk mundet me u largu nga mentaliteti i nacionalizmit serb”, ka deklaruar Gecaj. Nga ana tjetër, njohësi i çështjeve të sigurisë, Bedri Elezi, ka ngritur pikëpyetje nëse autoritetet kosovare kanë lëshuar leje zyrtare për këtë hyrje, ndërsa ka theksuar se prania e tyre në vend nuk mund të ndodhte pa dijeninë e strukturave të sigurisë. “E para, nuk besoj që institucionet tona nuk kanë pasur informacione. Por, të jeni të sigurt që për natyrë të presionit publik e kanë mbajtur të fshehtë. Unë jam shumë i bindur se këtu mund të ketë pasur edhe polici dhe në asnjë mënyrë nuk kanë mundur t’i jenë shmangur syrit policor. Unë personalisht e shoh këtë fotografi. Ju e dini se do të ketë zgjedhje presidenciale në Serbi. Kjo vizitë dhe kjo fotografi tenton të ulë atë narracionin që po tenton të zhbëjë narracionin e Vuçiqit që Kosovë është shitur. Nuk e dimë nëse kanë kërkuar leje, ose jo. Temën e Kosovës e mbajnë gjallë për shkak të zgjedhjeve në Serbi”, është shprehur Elezi.