Tragjedia e Arlinda Zekajt: Komisioni parlamentar premton transparencë të plotë pas përplasjeve për dokumentet

Komisioni Hetimor Parlamentar, i mandatuar për të shqyrtuar veprimet dhe mosveprimet e institucioneve në rastin e vrasjes së Arlinda Zekajt, si dhe trajtimin e dhunës në familje ndaj grave dhe fëmijëve, ka zhvilluar sot mbledhjen e radhës. Pas një debati paraprak mes anëtarëve, takimi ka vazhduar punën me dyer të mbyllura për publikun. Kjo mbledhje vjen në vazhdën e diskutimeve të zhvilluara të premten e kaluar, ku në qendër të vëmendjes ishte mosdorëzimi i raporteve zyrtare të kërkuara nga Ministria e Drejtësisë dhe Ministria e Punëve të Brendshme. Gjatë takimit të sotëm, kryesuesi i komisionit, Burim Ramadani, njoftoi se Zyra e Kryeministrit ka dorëzuar dokumentet e kërkuara nga këto dy dikastere, duke shënuar kështu hapat e parë të bashkëpunimit institucional për këtë çështje. Megjithatë, deputeti Eman Rrahmani, nga radhët e PDK-së, ka ngritur akuza të forta ndaj ekzekutivit, duke theksuar se Zyra e Kryeministrit po tenton të fshehë dështimet e mekanizmave shtetërorë në mbrojtjen e viktimës. “Në vend që angazhimi i Zyrës së Kryeministrit t’i ndihmojë këtij komisioni në zbardhjen e përgjegjësisë së të gjithë zinxhirit institucional, ai po shfaqet si pengesë dhe po manipolon procesin. Qasja e tyre po shërben për të mbuluar mangësitë dhe për të shmangur zbulimin e dështimit të shtetit për t’i dalë në mbrojtje jetës së një gruaje”, u shpreh Rrahmani. Në përgjigje të këtyre zhvillimeve, kryesuesi Burim Ramadani u zotua para mediave se puna e komisionit do të karakterizohet nga transparenca absolute. “Kemi pasur qëndrime të kundërta dhe nuk jemi pajtuar për çdo gjë, por secili prej nesh është shprehur hapur dhe këto dallime nuk janë fshehur nga askush”, deklaroi Ramadani, duke konfirmuar vendimin që pjesa e mbetur e mbledhjes të vazhdojë pa praninë e mediave. Në axhendën e kësaj mbledhjeje ishin parashikuar plotësim-ndryshimi i Planit të Punës dhe kalendarit të aktiviteteve, përgatitja paraprake e listës së dokumenteve që do t'i kërkohen institucioneve përgjegjëse, si dhe miratimi i buxhetit të komisionit. Komisioni Hetimor Parlamentar u themelua më 29 tetor nga Kuvendi i Kosovës, me një mandat gjashtëmujor. Ai ka për detyrë të hetojë përgjegjësinë institucionale lidhur me vrasjen e Arlinda Zekajt, ngjarje tragjike kjo e ndodhur më 25 tetor në Vitomiricë të Pejës, si dhe të analizojë efikasitetin e trajtimit institucional të rasteve të dhunës në familje.