Këto janë tri pajisjet që ju rrisin faturat e energjisë pa e kuptuar

Përpjekjet për të ulur shpenzimet e energjisë elektrike shpesh dështojnë, pasi qytetarët fokusohen te fikja e dritave apo kufizimi i përdorimit të pajisjeve, duke neglizhuar një faktor kyç: konsumin e fshehtë. Shumë prej nesh nuk e dinë se pajisjet vazhdojnë të tërheqin rrymë edhe atëherë kur nuk janë në funksion. Ky fenomen, i njohur ndryshe si konsumi i gatishmërisë, ndodh sa herë që aparatet mbeten të lidhura në prizë ose në modalitetin e pritjes. Megjithëse shifra ditore mund të duket e papërfillshme, ajo refuzohet ndjeshëm në faturat mujore dhe vjetore të energjisë. Ekspertja Natalia Lachim tërheq vëmendjen se disa pajisje shtëpiake vijojnë të harxhojnë energji edhe pasi përdoruesi i ka fikur ato, prandaj ajo sugjeron shkëputjen e menjëhershme nga priza pas çdo përdorimi. "Nëse e lini pajisjen të lidhur dhe të ndezur, edhe kur nuk e përdorni, ajo do të vazhdojë të përdorë energji elektrike dhe do të rrisë faturat tuaja. Për të ulur konsumin, shkëputeni nga priza", deklaroi Lachim. Ndër pajisjet e para në listë është televizori. Një gabim i zakonshëm i konsumatorëve është besimi se televizori është fikur plotësisht përmes telekomandës, ndërkohë që në realitet ai thjesht kalon në modalitetin e gatishmërisë. "Shumë njerëz gabimisht supozojnë se televizori fiket plotësisht kur shtypin një buton në telekomandë, por kjo nuk është gjithmonë rasti", theksoi Lachim, duke shtuar se ky konsum pasiv rrit ndjeshëm shpenzimet gjatë gjithë vitit. Ajo vuri në dukje gjithashtu kazanin elektrik. Edhe pse nuk renditen ndër shpenzuesit më të mëdhenj të rrjetit, disa prej këtyre pajisjeve vazhdojnë të konsumojnë rrymë edhe në gjendje joaktive, veçanërisht nëse zotërojnë opsione shtesë si ruajtja e temperaturës, çka e bën të domosdoshme heqjen nga priza. Një rast i ngjashëm është ai i karikuesve të telefonave celularë dhe pajisjeve të tjera. Shumë qytetarë i mbajnë ata të kyçur vazhdimisht për lehtësi, por një karikues i lënë në prizë pa asnjë pajisje të lidhur në të vijon të harxhojë energji kot. "Ndërsa një mbushës i vendosur në prizë pa një pajisje të lidhur mund të mos jetë një konsumator i madh, ai prapëseprapë po harxhon energji pa nevojë", përfundoi Lachim.