Foda shpall synimin madhor: Synojmë fitoren ndaj Izraelit dhe ruajtjen e vendit në Ligën B

Përzgjedhësi i Përfaqësueses së Kosovës, Franco Foda, ka dalë të hënën para mediave për të diskutuar rreth sfidave të muajit nëntor në Ligën e Kombeve, peshën e madhe të duelit me Izraelin, risitë në listën e lojtarëve dhe vëzhgimin e vazhdueshëm të kampionatit vendor. Foda ka theksuar se misioni kryesor i "Dardanëve" që nga nisja e këtij edicioni ka qenë sigurimi i mbijetesës në Ligën B, ndërsa triumfi ndaj Izraelit vlerësohet si çelës për përmbushjen e këtij synimi. “Synimi ynë është gjithmonë t’i fitojmë të gjitha ndeshjet, por objektivi që nga fillimi ka qenë që në çdo rrethanë të mbetemi në Ligën B. Prandaj, ndeshja kundër Izraelit ka rëndësi shumë të madhe për ne dhe duam patjetër ta fitojmë. Më pas do të shohim nëse do të kemi mundësi ta përfundojmë grupin në vendin e parë apo të dytë”, deklaroi Foda. Strategu gjerman ka sqaruar gjithashtu arsyet e grumbullimit të talenteve të rinj për këtë periudhë, duke bërë të ditur se këto ndeshje shërbejnë për të testuar potencialin e tyre në shërbim të së ardhmes së ekipit kombëtar. “Edhe në këtë edicion të Ligës së Kombeve kemi mundësinë të ftojmë lojtarë të rinj dhe të krijojmë një pasqyrë më të qartë për cilësitë e tyre brenda Kombëtares. Në të njëjtën kohë, po përgatitemi në mënyrë indirekte edhe për kualifikimet e Kampionatit Evropian të vitit të ardhshëm”, u shpreh ai. Nga ana tjetër, trajneri konfirmoi se stafi i tij teknik monitoron në vazhdimësi lojtarët, pavarësisht ligës ku ata bëjnë karrierë, ndërsa shtoi se është shpesh i pranishëm në Kosovë për të ndjekur nga afër ndeshjet e Superligës. “Është gjithmonë e rëndësishme që një Kombëtare të mendojë edhe për të ardhmen, t’u japë mundësi lojtarëve të rinj të prezantohen dhe të tregojnë vlerat e tyre. Ne i përcjellim të gjithë futbollistët, pavarësisht se në cilën ligë luajnë. Jam shpesh në Kosovë dhe i ndjek ndeshjet e kampionatit, por udhëtoj edhe në vendet e tjera ku aktivizohen futbollistët tanë. Gjithashtu, përcjellim vazhdimisht talentet e reja që luajnë jashtë vendit. Detyra jonë është të kemi një Kombëtare konkurruese në të tashmen, por edhe të shikojmë përpara, duke i dhënë ekipit energji të re”, theksoi përzgjedhësi. Duke u ndalur te futbolli vendor, Foda ka vlerësuar ecurinë e Superligës së Kosovës, duke evidentuar tri skuadrat që po kryesojnë garën për kreun e tabelës. “Superligën e Kosovës e përcjell shumë shpesh. Jam vazhdimisht këtu, i njoh skuadrat dhe kam kontakte edhe me disa prej presidentëve të klubeve. Për mua nuk ka rëndësi nëse një futbollist luan në Kosovë, Gjermani, Spanjë apo Itali. Ajo që ka rëndësi është paraqitja e tij në fushë. Këtë sezon kemi një kampionat mjaft interesant. Malisheva, Prishtina dhe Drita janë aktualisht tri skuadrat që po spikasin. Çdo futbollist që paraqitet mirë dhe tregon vazhdimësi në performancat e tij, e ka mundësinë të marrë një ftesë nga Kombëtarja”, deklaroi Foda. Në përmbyllje të konferencës, tekniku gjerman ka shpjeguar kriteret e përzgjedhjes për ndeshjet e nëntorit, duke nënvizuar se forma aktuale është vendimtare, por jo e vetmja. Duke marrë si shembull Milot Rashicën, i cili nuk ka pasur hapësira të mjaftueshme te Besiktas, ai vlerësoi se anësori ka dëshmuar gjithmonë se di t'i sjellë energji dhe cilësi skuadrës kombëtare kur i jepet mundësia. “Për Kombëtaren ka rëndësi se cilët lojtarë janë aktualisht në formë dhe në gjendje të mirë fizike. Megjithatë, duhet t’i shohim gjërat në një kontekst më të gjerë. Për shembull, Milot Rashica po luan pak te Besiktas...