Rrëfimi pa doreza i Fermín López: E vërteta për Laminen, Lionel Messi dhe jeta pas famës

Mesfushori i talentuar i Barcelonës dhe i kombëtares spanjolle, Fermín López, ka hapur dyert për një intervistë ndryshe, duke zbuluar prapaskena nga dhoma e zhveshjes, raportet me bashkëlojtarët dhe sfidat e jetës si sportist profesionist. Në një bashkëbisedim të shkurtër dhe të drejtpërdrejtë, futbollisti ka ndarë me publikun detaje personale, duke u përgjigjur pa filtra rreth preferencave të tij në fushën e gjelbër dhe jashtë saj, ndërkohë që nuk i ka kursyer as batutat për shokët e skuadrës. Duke u ndalur te zgjedhjet e tij, spanjolli veçoi Lionel Messin, Fabián Ruiz dhe Mikel Oyarzabal si tre yjet e preferuar që nuk mbrojnë ngjyrat e katalanasve. Ndërkohë, kur u pyet se me cilin nga bashkëkombësit apo kolegët e skuadrës nuk do të pranonte kurrë të jetonte nën të njëjtën çati, ai u përgjigj me humor: “Kjo është pyetje për të më futur në telashe, apo jo? Po, do të thoja… Lamine.” Duke qeshur, ai e përmendi përsëri yllin e ri si personin më aktiv në rrjetet sociale dhe atë që kujdeset më së shumti për pamjen e jashtme. López u ndal gjithashtu te ndryshimet e mëdha që ka sjellë fama në përditshmërinë e tij. Ai pranoi se gjëja që i mungon më shumë është liria për të bërë jetë normale, ndërsa situatën më surreale prej se është bërë i njohur e quajti momentin kur mbështetësit e ndjekin deri në prag të shtëpisë. Në fund të rrëfimit, mesfushori zbuloi edhe një talent të fshehtë jashtë futbollit, duke u shprehur se është mjaft i zoti në pingpong, ndërsa dha një premtim me shaka se në të ardhmen mund të eksperimentojë me një stil të ri flokësh, duke i lyer ato bionde.