Mërgata në fokus të kryeministrit Kurti në Francë: Zbardhen lehtësitë e reja për investime në Kosovë

Kryeministri i Kosovës, Albin Kurti, ka zhvilluar të dielën një bashkëbisedim me përfaqësues të diasporës shqiptare në Francë, në prag të nisjes së punimeve të Forumit të Paqes në Paris. Gjatë këtij takimi, në qendër të vëmendjes kanë qenë mundësitë e shtimit të bashkëpunimit, përfshirja më e gjerë e bashkatdhetarëve në sferën publike dhe institucionale të vendit, si dhe nxitja e nismave biznesore. Nëpërmjet një adresimi në rrjetet sociale, kreu i ekzekutivit vlerësoi se angazhimi i mërgatës në institucionet e Kosovës ndihmon ndjeshëm në konsolidimin e shtetit. Kjo, sipas tij, arrihet falë shfrytëzimit të shkathtësive, dijes profesionale dhe etikës së punës të fituar në vendet perëndimore. Në këtë kuadër, Kurti ka vënë in-focus skemën e re të quajtur “Dritarja për Investime të Diasporës”, e cila synon t'u japë mbështetje konkrete sipërmarrësve nga diaspora që duan të zgjerojnë aktivitetin e tyre financiar në atdhe. Sipas shefit të qeverisë, shteti kosovar do të funksionojë si garantues për huatë bankare të destinuara për këto projekte, duke u bërë mbështetje direkte përmes sigurimit të hipotekës. "Kësisoj mërgata lëvizë drejt kapërcimit nga sakrifica për të kontribuuar në investim për të fituar", ka shkruar Kurti.