Besa Shahini bëhet nënë për herë të parë, zbulon arsyen e shkëputjes dhe vlerëson lart stafin e QKUK-së

Ish-kandidatja për drejtimin e komunës së Prishtinës, Besa Shahini, ka ndarë me ndjekësit lajmin se është bërë nënë, duke sqaruar se pikërisht kjo ngjarje e bukur ka qenë shkak i mungesës së saj të fundit në skenën publike. “Miq, ju falënderoj nga zemra për urimet. U bënë tri javë prej kur lindi bebi, kësaj radhe në QKUK-në e Prishtinës. Kjo është edhe arsyeja pse nuk e kam pasur të mundur angazhimin publik dhe përfshirjen në diskutimet e rëndësishme, prej aktgjykimit të Hagës e testit PISA, deri te rregullorja për tarifa dhe taksa të hyrjes në qendër të Prishtinës, që del në votim sot në Kuvendin Komunal. Do të marr edhe disa javë kohë para se të rifilloj angazhimin”, ka shkruar ajo. Më tej, ajo ka shprehur mirënjohje të thellë për ekipin mjekësor në Qendrën Klinike Universitare të Kosovës, duke vënë theksin te përkushtimi i treguar gjatë dhe pas procesit të lindjes. “Por një gjë dua ta them qysh sot: kujdesi në QKUK ka qenë shumë i mirë. I falënderoj mjekët, por sidomos infermierët, që kanë ndihmuar në lindje dhe janë përkujdesur për ne pas lindjes”, u shpreh Shahini. Gjatë rrëfimit të saj, ajo nuk la pa përmendur kushtet sfiduese me të cilat ballafaqohet ky staf, duke theksuar pagat e ulëta dhe ngarkesën e tejskajshme për shkak të numrit të pamjaftueshëm të punonjësve krahasuar me fluksin e pacientëve. Duke iu referuar shifrave zyrtare, ajo solli në vëmendje statistikat: “Numrat e publikuar nga Agjencia e Statistikave tregojnë se në sistemin publik të Kosovës punojnë mbi 7,700 infermierë, që jep një raport prej vetëm 5 infermierësh për 1,000 banorë. Krahasimisht, sipas Bankës Botërore, në vitet 2020–2022, numri i infermierëve për banorë ishte mbi 12 në Gjermani dhe Danimarkë, ndërsa në Norvegji arrin në mbi 16 për 1,000 banorë. Numrat e Kosovës janë më të krahasueshëm me vendet në zhvillim. Sipas projektit Converge2EU, Kosovës i duhen 41 vite për të arritur mesataren e BE-së. Ndërsa, sa i përket numrit të shtretërve spitalorë për kokë banori, numri është aq i vogël saqë do t’i duhen mbi 100 vite për të arritur mesataren e BE-së”. Në fund të reagimit të saj, Shahini bëri thirrje për ndërhyrje urgjente shtetërore, duke e cilësuar situatën si një sfidë madhore për të ardhmen. “Kosova nuk është imune ndaj presionit demografik dhe do të ketë nevojë për investime drastike në shërbimin shëndetësor për një popullatë që po plaket. Kjo është një emergjencë kombëtare që qeveria duhet ta adresojë urgjentisht”.