Buxheti 2027: Mbi 224 milionë euro për Ministrinë e Mbrojtjes, gjysma për investime kapitale

Projektbuxheti për vitin e ardhshëm ka rezervuar një mbështetje të fuqishme për sektorin e mbrojtjes, ku nga mbi 224 milionë euro të parapara për këtë dikaster, më shumë se 122 milionë euro do të shkojnë ekskluzivisht për investime kapitale. Theksi kryesor vazhdon të vendoset te modernizimi, blerja e pajisjeve dhe ngritja e kapaciteteve të Forcës së Sigurisë së Kosovës. Qeveria e Kosovës ka miratuar të hënën projektbuxhetin për vitin 2027, vlera e të cilit kap shifrën prej 4.27 miliardë eurosh. Ky plan buxhetor parashikon mbi 1.4 miliard euro për subvencione dhe transfere, ndërsa mbi një miliard euro janë ndarë për secilën nga kategoritë e pagave e shtesave dhe të investimeve kapitale. Në këtë kuadër, Ministria e Mbrojtjes, nën të cilën funksionon FSK-ja, do të ketë në dispozicion saktësisht 224 milionë e 168 mijë e 705 euro për periudhën e ardhshme. Nga kjo shumë, 122.4 milionë euro janë planifikuar për investime kapitale, kurse 58.7 milionë euro do të mbulojnë pagat dhe shtesat e pjesëtarëve të saj. Kjo alokim financiar synon të përshpejtojë transformimin e FSK-së në një forcë moderne, profesionale dhe plotësisht të ndërveprueshme me standardet e NATO-s, duke përmbushur kështu mandatin e saj kushtetues dhe ligjor. Ekspertët e sigurisë vlerësojnë se fondet për ushtrinë nuk janë kurrë plotësisht të mjaftueshme përballë nevojave për armatim dhe pajisje bashkëkohore, por pranojnë se investimet e deritanishme po e orientojnë forcën drejt një fuqizimi të mirëfilltë ushtarak. "Çështjet e pajisjeve me armatim të ri çdo here shkon në vlerësim të nevojave çfarë kërkohen standarde apo luftimet çfarë sjellin ndryshimet edhe koncepteve luftarake, sidomos ka të bëjë me sistemin raketrore dron mbrojtja kundërajrore sistemi i luftës antiblind e deri tek mbrojtja nga lufta kibernetike, mendoj që FSK po i mbushë kapacitete e pritura...", thotë Nuredin Ibishi, njohës i çështjeve të sigurisë. Ndërkohë, njohësit e gjeopolitikës theksojnë se Kosova po dëshmon përkushtim të lartë në përmbushjen e kritereve të NATO-s për ndarjen e buxhetit në mbrojtje, duke investuar mbi 2 për qind të BPV-së. "Janë mbi 2 për qind të BPV po natyrisht që Kosova ka një situatë më komplekse sepse Kosova është duke i ngritur kapacitetet e saja prej fillimit dhe unë konsiderojë edhe më tej jo për të ndërtuar një barrë të re për buxhetin e Kosovës por për të përmbyllur transformimin rrënjësor të Forcës së saj të sigurisë sepse po bëjmë ushtri nga fillimi dhe po bëhet ushtria komfor standardeve të NATO-s...", thotë Dorajet Imeri, profesor i gjeopolitikës dhe çështjeve të sigurisë. Në fund, ekspertët pajtohen se ky investim buxhetor mbetet një domosdoshmëri strategjike për të rrumbullakosur fazën e zhvillimit të FSK-së në një forcë që garanton siguri sipas standardeve euroatlantike.