Gjoba prej 5 milionë lekësh në protestë, flet 17-vjeçari: Familja ime jeton me KEMP, nuk kam gjuajtur me gurë

Adoleshenti 17-vjeçar që u ndëshkua me një masë administrative prej 5 milionë lekësh pas tubimit të së shtunës, ka ndarë detaje rreth gjendjes së rëndë ekonomike të familjes së tij, duke bërë të ditur se është e pamundur për të që të shlyejë këtë gjobë. Në një prononcim dhënë për News24 gjatë zhvillimit të protestës së sotme, i riu tregoi se shtëpia e tij mbahet vetëm përmes ndihmës ekonomike dhe pensionit të invaliditetit (KEMP), ndërsa shtoi se ka vite që ka humbur nënën. Ai këmbëngul se gjatë tubimit ka qenë duke luajtur dhe nuk ka pasur asnjë lidhje me protestën. Sipas dëshmisë së tij, nuk ka dashur as ta njoftojë të atin për gjobën e vendosur, pasi shuma prej 5 mijë eurosh brenda afatit prej 10 ditësh është e papërballueshme për ta. Pavarësisht kushteve të vështira, 17-vjeçari u shpreh se nuk do tërhiqet nga mbrojtja e atyre që i konsideron si të drejta të tij, duke shtuar se do të jetë i pranishëm në çdo tubim deri në largimin e kryeministrit Edi Rama. Duke rrëfyer më tej, protestuesi u shpreh: "Unë isha duke luajtur, nuk kam qenë pjesë e protestës. Babin nuk e kam lajmëruar, sepse nuk mund të paguaj dot 5 mijë eurot për 10 ditë. Nëna më ka vdekur, më ka ndërruar jetë ka shumë vite. Me kemp kam familjarët, që marrin në total 240 mijë lekë". "Nuk na del aspak. Unë kam punuar në mobileri, merrja 360 mijë lekë, nuk del për asgjë. Unë kam dalë për të drejtat e mia dhe të drejtat e Shqipërisë. Shteti asgjë nuk më jep për vdekjen e nënës, vetëm në shkollë marr një bursë", shtoi ai. Në përmbyllje të fjalës së tij, i riu theksoi: "Nuk kam ku t’i gjej lekët. Në protestë do marr pjesë derisa të japë dorëheqjen Rama. Nuk më frikëson asgjë".