Krizë humanitare në Ishujt Kanarie: Mbi 8 mijë emigrantë zbarkojnë me varka brenda pesë javëve

Ishujt Kanarie të Spanjës janë përfshirë nga një gjendje e rëndë emergjence, pasi më shumë se tetë mijë emigrantë kanë mbërritur me mjete lundruese gjatë pesë javëve të fundit. Ky fluks i lartë ka shtrënguar autoritetet lokale që të shpallin emergjencën sociale dhe të kërkojnë ndërhyrje të menjëhershme si nga ekzekutivi spanjoll, ashtu edhe nga strukturat evropiane. Kreu i qeverisë rajonale të Ishujve Kanarie, Fernando Clavijo, ka njoftuar se kryeministri spanjoll, Pedro Sánchez, ka pranuar kërkesën për të thirrur një mbledhje urgjente të Komisionit Ndërministror për Emigracionin. Ky takim ka për qëllim përcaktimin e masave të duhura për të përballuar valën e emigrantëve dhe për të lehtësuar ngarkesën e madhe mbi burimet dhe shërbimet vendase. Bazuar në shifrat e bëra publike nga qeveria rajonale, vetëm në periudhën 1 deri më 6 nëntor, në brigjet e Ishujve Kanarie kanë mbërritur 49 varka me gjithsej 4,587 emigrantë në bordin e tyre. Nga ky total, 35 varka kanë zbarkuar në ishullin El Hierro, ku autoritetet vendore e kanë përshkruar ngarkesën mbi infrastrukturën lokale si “të jashtëzakonshme”. Clavijo theksoi se e ka njohur kryeministrin Sánchez me dimensionet e vërteta të kësaj krizë në ishull, si dhe me pakënaqësinë në rritje të popullsisë vendase përballë ardhjeve të pandërprera të emigrantëve. Ai shtoi se Ishujt Kanarie prej kohësh kanë kërkuar më shumë fonde, një planifikim më efikas dhe një qasje të unifikuar nga ana e qeverisë. “Ky takim duhet të shërbejë për të rënë dakord, mes të dyja qeverive dhe ministrive përkatëse, për një plan të përbashkët veprimi, me masa konkrete, përgjegjësi të përcaktuara dhe afate për zbatimin e tyre. Nuk mund të vazhdojmë të veprojmë vetëm kur situata përkeqësohet”, shkroi Clavijo në rrjetet sociale. Në një linjë me këto zhvillime, presidenti i Ishujve Kanarie ka kërkuar gjithashtu takime urgjente me presidenten e Komisionit Evropian, Ursula von der Leyen, dhe komisionerin evropian për Çështjet e Brendshme dhe Migracionin, Magnus Brunner, me qëllim sigurimin e mbështetjes së Bashkimit Evropian në menaxhimin e kësaj situate. Në të njëjtën kohë, autoritetet në El Hierro bëjnë me dije se ky nivel i lartë mbërritjesh po jep efekte negative të rënda mbi kapacitetet akomoduese dhe burimet ekzistuese, duke rritur nevojën urgjente për veprime konkrete dhe një përgjigje të përbashkët institucionale.