Tragjedi hekurudhore në Egjipt: Përplasja e dy trenave lë 4 të vdekur dhe dhjetëra të plagosur

Një aksident i rëndë hekurudhor ka tronditur jugun e Kajros ditën e diel, pasi dy trena pasagjerësh janë përplasur mes tyre. Si pasojë e këtij incidenti tragjik, të paktën katër persona kanë ndërruar jetë, ndërkohë që numri i të lënduarve ka arritur në 88, konfirmim ky i dhënë zyrtarisht nga Ministria e Shëndetësisë e Egjiptit. Sipas informacionit të bërë publike nga Autoriteti Shtetëror Hekurudhor, ngjarja ka ndodhur rreth 76 kilometra në jug të kryeqytetit. Përplasja ka ndodhur mes një treni që po udhëtonte nga Giza në drejtim të Fayoum-it dhe një tjetri që nisej nga Kajro me destinacion Asuanin, një goditje kjo që ka shkaktuar daljen nga shinat të disa vagonëve. Në lidhje me këtë ngjarje të rëndë ka reaguar menjëherë krerët e shtetit. Presidenti Abdel Fattah al-Sisi ka lëshuar një urdhër të prerë për nisjen e një hetimi të menjëhershëm, duke theksuar se çdo person përgjegjës për neglizhencë do të përballet me drejtësinë. Ndërkohë, strukturat e emergjencës ndodhen në terren dhe po punojnë intensivisht për pastrimin e zonës nga mbetjet dhe rrënojat. Autoritetet hekurudhore bënë të ditur se synimi kryesor është rikthimi i qarkullimit në linjën e rëndësishme që lidh Kajron me Egjiptin e Sipërm, ndërsa ende nuk është përcaktuar një afat kohor se kur do të normalizohet plotësisht trafiku hekurudhor.