Sukses historik në Indi: Waltert dhe Karamoko rrëmbejnë trofeun e çifteve në Chennai

Tenistet nga Zvicra, Simona Waltert dhe Naïma Karamoko, kanë shkëlqyer në turneun WTA 250 që u mbajt në Chennai të Indisë, duke ngritur lart trofeun ekampioneve në konkurrencën e dysheve. Në ndeshjen përfundimtare, dyshja helvetike pati një paraqitje fantastike, duke mposhtur bindshëm me rezultatin 2:0 në sete (6:3, 6:0) çiftin vendës të përbërë de Vaishnavi Adkar dhe Rutuja Bhosale. Për 25-vjeçaren nga Graubündeni, Simona Waltert, ky është titulli i dytë në karrierë nën ombrellën e turneve WTA në disiplinën e çifteve. Suksesin e saj të parë ajo e kishte regjistruar në vitin 2021 në Lozanë, duke luajtur krah Susan Bandecchi. Nga ana tjetër, për 29-vjeçaren nga Gjeneva, Naïma Karamoko, ky triumf përbën një moment historik, pasi është titulli i saj i parë ndonjëherë në një finale të nivelit WTA. Karamoko, e cila prej kohësh është e fokusuar ekskluzivisht te kategoria e çifteve, mban aktualisht edhe statusin e tenistes më të mirë zvicerane në këtë disiplinë, duke u pozicionuar në vendin e 99-të botëror. Pas këtij suksesi në tokën indiane, për sportisten zvicerane 29-vjeçare s’ka kohë për pushim, pasi pas dy javësh e pret një tjetër angazhim madhor: debutimi me fanellën e Përfaqësueses së Zvicrës në kuadër të turneut ndërkombëtar Billie Jean King Cup, që do të zhvillohet në Tajlandë.