Operacion i suksesshëm: Nxirret nga ujërat e Ujmanit vetura e zhytur muaj më parë

Automjeti që kishte përfunduar në thellësi të liqenit të Ujmanit gjatë muajit tetor të vitit 2025 është nxjerrë me sukses gjatë ditës së diel, falë një aksioni të përbashkët të ndërmarrë nga Policia e Kosovës dhe autoritetet e tjera kompetente. Sipas informacioneve zyrtare nga Policia, ndërhyrja ka nisur rreth orës 10:00 të paradites, ndërsa pas gjetjes dhe lokalizimit të saktë, vetura është nxjerrë në breg rreth orës 12:40. Në këtë aksion sfidues morën pjesë njësitë elitare të Policisë së Kosovës, Ekipi Nacional i Kërkim-Shpëtimit, Agjencia për Menaxhimin e Emergjencave, si dhe zhytësit nga Klubi i Zhytjes “Trepça”. Rënia e ndjeshme e kuotave të ujit në liqen ka krijuar kushtet e përshtatshme për ndërhyrjen e ekipeve, e cila përveç karakterit operacional, shërbeu edhe si një ushtrim praktik për rritjen e gatishmërisë së strukturave pjesëmarrëse. Ky rast ishte denoncuar fillimisht më 14 tetor 2025, kur pronari kishte lajmëruar se makina e tij, e lënë e parkuar jashtë korsisë në afërsi të liqenit, kishte rënë në ujë në rrethana ende të paqarta. Në përfundim të operacionit, automjeti i është kthyer pronarit të tij të ligjshëm, konfirmoi Policia e Kosovës.