Ndeshje makthi për Luganon në Zvicër: Frokaj shënon në triumfin e thellë të St. Gallenit, Ajeti ndëshkohet me të kuq

Lugano ka regjistruar humbjen e parë këtë edicion në Superligën zvicerane, pasi është mposhtur rëndë me shifrat 5:0 në udhëtim te St. Galleni. Skuadra nga Ticino kaloi në një pasdite për t'u harruar, ku rrethanat dhe ngjarjet në fushë shkuan plotësisht kundër interesave të tyre, ndërsa ndikim të madh patën edhe kartoni i kuq i hershëm dhe dëmtimi i portierit. Në këtë duel, St. Galleni inkuadroi në lojë Betim Fazlijin në minutën e 76-të, kurse Leon Frokaj u fut në fushë në minutën e 80-të. Nga ana tjetër, te Lugano e nisën takimin nga minuta e parë Albian Ajeti dhe Uran Bislimi, me këtë të fundit që u zëvendësua në minutën e 80-të, ndërsa në pjesën e dritë u aktivizua edhe Ezgjan Alioski. Kthesa e ndeshjes nisi që në minutën e 11-të, kur sulmuesi shqiptar Albian Ajeti u ndëshkua me karton të kuq. Ai bëri një ndërhyrje të rrezikshme ndaj Hugo Vandermerschit, duke e goditur në këmbë me taka të hapura. Gjyqtari Sven Wolfensberger nuk pati dilema dhe e përjashtoi menjëherë futbollistin e Luganos. Vështirësitë për mysafirët u shtuan në minutën e 26-të, kur portieri David von Ballmoos pësoi një lëndim pa kontakt me kundërshtarin dhe u detyrua të lërë fushën e blertë. Avanzimi numerik u shfrytëzua në mënyrë perfekte nga vendasit pas gjysmë ore lojë, duke realizuar dy herë brenda vetëm 13 sekondave. Fillimisht, Chima Okoroji zhbllokoi shifrat në 1:0 pas një aksioni të kombinuar bukur me Lukas Daschnerin. Pa u këndellur mirë, Lugano lëshoi sërish pe kur Lukas Görtler ndërpreu një pasim të gabuar të Lukas Mait, ndërsa Daschner asistoi për Andrin Hunzikerin, i cili shënoi për 2:0. St. Galleni nuk e uli ritmin dhe, në minutat shtesë të fraksionit të parë, realizoi edhe golin e tretë përmes Tom Gaalit, i cili u tregua i saktë me kokë pas harkimit të Lukas Görtlerit. Pjesa e dytë solli sërish golbërësit vendas, me Andrin Hunzikerin që shënoi golin e tij të dytë personal në minutën e 66-të, duke e thelluar epërsinë në 4:0. Epilogun përfundimtar prej 5:0 e vulosi Leon Frokaj në minutën e 84-të, nëpërmjet një goditjeje të fuqishme nga distanca. Lugano provoi të reagojë me disa raste sporadike, ku mundësia më e mirë ishte goditja me kokë e Joel Bichselit në minutën e 64-t, e cila u ndal nga shtylla. Pavarësisht këtij rezultati zhgënjyes, Lugano ruan kryesimin e tabelës në Superligën zvicerane me 34 pikë, gjashtë më shumë se ndjekësi më i afërt, Young Boys. Ndërkaq, St. Galleni pozicionohet në vendet e larta të gjashtëshes me 22 pikë, duke konfirmuar formën e shkëlqyer me fitoren e katër në pesë takimet e fundit. Pas pushimit dyjavor për shkak të ndeshjeve të ekipeve kombëtare, Lugano do të kthehet në fushë më 21 nëntor nga ora 18:00, për të pritur Grasshoppersin në shtëpi. Nga ana tjetër, St. Galleni do të udhëtojë drejt Cyrihut më 22 nëntor, ku nga ora 14:00 do të masë forcat me FC Zurichun.