Tragjedi hekurudhore në Egjipt: Përplasja e dy trenave lë katër të vdekur dhe dhjetëra të plagosur

Një aksident i rëndë hekurudhor ka tronditur Egjiutin këtë të premte, ku si pasojë e daljes nga binarët dhe përmbysjes së disa vagonëve të një treni pasagjerësh në provincën Giza, katër persona kanë humbur jetën dhe 88 të tjerë kanë marrë lëndime të ndryshme, sipas të dhënave zyrtare të Ministrisë së Shëndetësisë. Ngjarja tragjike u regjistrua pranë zonës Gerza, në distriktin Al-Ayyat, përgjatë linjës hekurudhore bujqësore Kajro-Aswan. Për t'i dalë në ndihmë të lënduarve, autoritetet dislokuan menjëherë 72 autoambulanca në vendngjarje për t'i transportuar ata drejt spitaleve. Në lidhje me situatën e krijuar, ministri i Shëndetësisë, Khaled Abdel Ghaffar, lëshoi një urdhër të menjëhershëm për vendosjen në gatishmëri të lartë të spitaleve në Giza dhe në provincën fqinje Beni Suef, me qëllim garantimin e kujdesit mjekësor të menjëhershëm dhe cilësor për të dëmtuarit. Ndërkohë, dikasteri i shëndetësisë ka theksuar se po ndjek nga afër gjendjen shëndetësore të të plagosurve, ndërsa u ka shprehur ngushëllimet më të sinqerta familjarëve që humbën të afërmit e tyre në këtë ngjarje të rëndë. Nga ana e tyre, Hekurudhat Kombëtare Egjiptiane sqaruan dinamikën e aksidentit, duke bërë të ditur se treni me numër 134, i cili po qarkullonte nga Giza drejt Fajumit, ka goditur nga prapa trenin me numër 2010 që operonte në relacionin Kajro-Aswan. Përplasja ndodhi në segmentin mes stacioneve Kafr Ammar dhe Al-Riqqa, duke shkaktuar daljen e dhunshme të disa vagonëve nga shinat.