Tragjedi në brigjet e Senegalit: Mbytet varka me emigrantë, konfirmohen dhjetëra viktima

Të paktën 21 persona kanë ndërruar jetë si pasojë e mbytjes së një varke që transportonte emigrantë pranë zonës bregdetare të Senegalit, ndërkohë që autoritetet vendase kanë konfirmuar se deri më tani është shpëtuar vetëm një person. Ministria e Brendshme e Senegalit ka bërë të ditur se ekipet e emergjencës kishin nxjerrë 21 trupa të pajetë deri mbrëmjen e së shtunës, ndërsa aksioni për kërkim-shpëtimin e personave të tjerë të zhdukur vijon ende në terren. Ndonëse shifra zyrtare e viktimave mbetet paraprake dhe ende nuk dihet numri i saktë i pasagjerëve që ndodheshin në bordin e mjetit lundrues, burimet zyrtare konfirmojnë se tragjedia ka ndodhur pranë Kebemerit, afër dunave të Loumpoul, rreth 180 kilometra në veri të kryeqytetit Dakar, në rajonin veriperëndimor të vendit. Sipas informacioneve të siguruara nga shtypi vendas, pjesa dërrmuese e viktimave i përkisnin komuniteteve lokale nga zonat Leona dhe Thieppe, të cilat ndodhen brenda departamentit të Kebemerit. Të dhënat alarmante të publikuara nga organizata për të drejtat e emigrantëve, "Walking Borders", tregojnë se gjatë pesë muajve të parë të këtij viti, jo më pak se 635 persona kanë humbur jetën duke u përpjekur të përshkojnë këtë rrugë të rrezikshme migrimi.