Sulmi kibernetik në Itali: Hakerat pro-rusë nxjerrin në 'dark web' të dhënat e ministrit të Jashtëm Tajani

Roma zyrtare ka ngritur alarmin për një front të ri të luftës hibride, pasi grupi i njohur i hakerave pro-rusë, Noname, ka marrë në shënjestër figura të shquara italiane dhe evropiane. Në qendër të këtij sulmi kibernetik ka rënë ministri i Jashtëm i Italisë, Antonio Tajani, informacionet private të të cilit dhe të familjarëve të tij janë bërë publike në rrjetin e errët (dark web). Duke komentuar ngjarjen, zv.kryeministri e ka cilësuar këtë si një taktikë të mirëfilltë të luftës hibride, e cila përmes dezinformimit synon të manipulojë opinionin publik dhe të mbjellë përçarje mes vendeve evropiane, sidomos në këtë periudhë para zgjedhjeve. I pyetur nga gazetarët nëse do të ndërmarrë hapa diplomatikë duke thirrur ambasadorin rus, kreu i diplomacisë italiane theksoi se kërkohet maturi deri në sigurimin e provave zyrtare, ndërkohë që agjencitë e inteligjencës dhe policia po bashkëpunojnë ngushtë për zbardhjen e plotë të rastit. Për më tepër, ai bëri të ditur se kjo çështje shqetësuese do të jetë pjesë e diskutimeve në takimin e ardhshëm të ministrave të Jashtëm të G7-s, pas kërkesës që i ka drejtuar tashmë homologut të tij francez për t'u ndalur tek sfidat e sigurisë kibernetike. Në vijim të këtyre masave, ministri i Brendshëm, Matteo Piantedosi, ka thirrur për datën 10 nëntor mbledhjen e jashtëzakonshme të Komitetit Kombëtar për Rendin dhe Sigurinë Publike, ku do të analizohen në detaj rreziqet nga këto sulme. Ky operacion kibernetik nuk ka qenë i papritur, pasi prej dy javësh të kaluara hakerat kishin vënë shpërblime me para për këdo që siguronte kontaktet telefonike, email-et dhe të dhënat konfidenciale të personave që ata i shohin si kundërshtarë të Moskës. Në shënjestër të këtij grupi kanë rënë gjithsej 18 persona, mes të cilëve figuron edhe presidenti i Eurojust-it, Michael Schmid di, si dhe funksionarë të lartë të drejtësisë dhe strukturave policore gjermane. Autoritetet kompetente në kryeqytetin italian kanë nisur hetimet intensive, megjithatë të dhënat e shpërndara vazhdojnë të mbeten të aksesueshme online në rrjetin e errët, pasi heqja e tyre përbën një sfidë të mirëfilltë teknike në aspektin e sigurisë kompjuterike.