Romë zyrtare jep alarmin për luftën kibernetike: Hakerat pro-rusë nxjerrin në 'dark web' të dhënat e ministrit Antonio Tajani

Kryeqyteti italian është vënë në lëvizje pas një sulmi kibernetik të drejtuar nga grupi i hakerave pro-rusë, “Noname”, të cilët kanë marrë në shënjestër figura të shquara italiane dhe evropiane. Në qendër të këtij operacioni dashakeqës ka rënë zëvendëskryeministri dhe ministri i Jashtëm i Italisë, Antonio Tajani, të dhënat private të të cilit, bashkë me ato të familjarëve të tij, janë bërë publike në rrjetin e errët të internetit (dark web). Duke e komentuar këtë incident, kryediplomati italian e ka përkufizuar atë si një akt të qartë të luftës hibride. Sipas tij, këto sulme kibernetike kanë për qëllim manipulimin e opinionit publik dhe përçarjen e aleatëve evropianë përmes fushatave të dezinformimit, sidomos tani që ndodhemi në një periudhë paraelektorale të ndjeshme. I pyetur në lidhje me një thirrje të mundshme të ambasadorit rus, ai theksoi se kërkohet maturi institucionale deri në sigurimin e provave konkrete, ndërkohë që agjencitë e inteligjencës dhe autoritetet policore po bashkëpunojnë ngushtë për zbardhjen e plotë të ngjarjes. Përballë këtij kërcënimi në rritje, ministri Tajani bëri të ditur se ky rast do të adresohet zyrtarisht në takimin e ardhshëm të shefave të diplomacisë së vendeve të G7-s, pasi ai vetë i ka kërkuar ministrit francez të Jashtëm që ky rrezik kibernetik të vendoset në fokus të diskutimeve. Në të njëjtën linjë reagimi, ministri i Brendshëm i Italisë, Matteo Piantedosi, ka thirrur për datën 10 nëntor mbledhjen e jashtëzakonshme të Komitetit Kombëtar për Rendin dhe Sigurinë Publike, ku do të analizohen në detaj sfidat dhe rreziqet nga sulmet në hapësirën digjitale. Sipas hetimeve paraprake, prej dy javësh ky rrjet hakerash kishte vënë shpërblime me para për këdo që siguronte kontaktet telefonike, adresat e emailit dhe detajet e tjera private të individëve që ata i cilësojnë si armiq të Federatës Ruse. Në shënjestër të tyre kanë rënë gjithsej 18 personalitete, mes të cilëve figura të larta si presidenti i Eurojust-it, Michael Schmid di, si dhe drejtues të lartë të sistemit të drejtësisë dhe policisë gjermane. Për këtë incident, prokuroria dhe autoritetet në Romë kanë nisur hetimet zyrtare. Megjithatë, materialet e ndjeshme të publikuara mbeten ende të aksesueshme në rrjetin e errët, pasi heqja e tyre teknike nga atje paraqet aktualisht një pamundësi për ekspertët e fushës.