A e ka tejkaluar realitetin Kurti me shifrat? Zemaj i kërkon qeverisë vetëm 17 emra të mjekëve të kthyer nga diaspora

Deputeti i Lidhjes Demokratike të Kosovës (LDK) dhe ish-ministri i Shëndetësisë, Armend Zemaj, ka ngritur dyshime të forta ndaj shifrave të prezantuara nga kryeministri Albin Kurti, i cili kishte deklaruar se gjatë vitit 2025 në Kosovë janë kthyer 171 mjekë për të jetuar dhe ushtruar profesionin e tyre. Përmes një reagimi publik, Zemaj ka vënë në sprovë ekzekutivin, dikasterin e shëndetësisë dhe Shërbimin Spitalor dhe Klinik Universitar të Kosovës (SHSKUK), duke u kërkuar atyre që të faktojnë këtë deklaratë përmes publikimit të listës së emrave të mjekëve specialistë të kthyer nga vendet perëndimore që tashmë janë të angazhuar në institucionet publike shëndetësore. “E sfidoj cilindo përfaqësues të Qeverisë, Ministrisë së Shëndetësisë apo SHSKUK-së që të na ofrojë vetëm 17 emra të mjekëve specialistë, jo 171, të cilët janë kthyer nga mërgata gjatë vitit 2025 dhe tashmë janë të punësuar me kontrata të rregullta në sistemin publik shëndetësor të Kosovës”, ka shkruar Zemaj në profilin e tij. Debati në distancë ka nisur pas fjalimit të kreut të qeverisë në ceremoninë hapëse të edicionit të katërt të “Swiss Medical School”, një ngjarje kjo e organizuar nga Lidhja e Mjekëve Shqiptarë në Zvicër. Në fjalën e tij para të pranishmëve, kryeministri Kurti vuri theksin te domosdoshmëria e intensifikimit të bashkëpunimit me profesionistët shëndetësorë që veprojnë në diasporë, duke zbuluar ndër të tjera se gjatë këtij viti 171 mjekë kanë vendosur të kthehen përfundimisht në atdhe për të kontribuar në shëndetësi. Krahas kësaj, shefi i ekzekutivit pati lëvduar edhe angazhimin e atyre bluzave të bardha që vazhdojnë të veprojnë jashtë kufijve, por që herë pas herë vizitojnë Kosovën për të mbajtur ligjërata, për të përgatitur gjeneratat e reja të mjekëve dhe për të shkëmbyer praktika të avancuara me stafin vendor. Megjithatë, reagimi i ashpër i opozitës kërkon transparencë dhe verifikim të menjëhershëm të statistikave zyrtare, duke kërkuar prova konkrete përtej premtimeve shifrore rreth punësimit të rregullt të specialistëve në spitalet dhe klinikat publike të vendit.