Iniciativa për sigurinë: Zajkova kërkon mbështetje qytetare për vendosjen e byzylykut elektronik për autorët e dhunës

Kryetarja e Partisë Liberale Demokratike (PLD), Monika Zajkova, ka njoftuar se pas kërkesave të shumta nga qytetarët, është iniciuar një peticion për implementimin e pajisjeve elektronike të monitorimit për personat e përfshirë në raste dhune. Sipas kësaj nisme, byzylyku elektronik do të shërbejë si një sistem alarmi që do të sinjalizojë menjëherë viktimën dhe do të njoftojë organet kompetente sapo abuzuesi të shkelë distancën e lejuar me ligj. Peticioni është zyrtarizuar ditën e djeshme dhe deri në këto momente ka arritur të sigurojë mbi 530 firma mbështetëse nga qytetarët. Në thirrjen e saj publike, Zajkova u ka bërë thirrje të gjithë qytetarëve që të bashkohen dhe të mbështesin këtë kauzë, e cila synon të shtojë mekanizmat mbrojtës dhe kontrollues ndaj individëve që ushtrojnë dhunë.