Simboli i festave: Bredhi 75-vjeçar mbërrin në Manhatan për t'u shndërruar në magjinë e Krishtlindjeve

Manhatani në Nju Jork ka mirëpritur një bredh gjigant 75-vjeçar dhe 23 metra të lartë, i cili do të jetë qendra e vëmendjes në sheshin e “Rockefeller Center” si simboli kryesor i festimeve të fundvitit. Pema e llojit norvegjez ka udhëtuar rreth 320 kilometra nga West Edmeston, brenda po të njëjtit shtet, për të mbërritur në destinacionin e saj. Me një peshë prej afërsisht 11 tonësh dhe një gjerësi prej rreth 15 metrash, ky kolos i natyrës ka tërhequr vëmendjen e kalimtarëve që nga momentet e para të vendosjes. Menjëherë pas mbërritjes, ekipi teknik ka përdorur një vinç për ta pozicionuar bredhin me sukses në sheshin e njohur “Rockefeller Center”, në afërsi të pistës tradicionale të patinazhit në akull. Prania e qindra qytetarëve gjatë këtij procesi ka shënuar edhe zyrtarisht nisjen e atmosferës festive në metropol. Gjatë ditëve në vijim, specialistët do të angazhohen në dekorimin e pemës, duke vendosur mbi të më shumë se 50 mijë drita LED shumëngjyrëshe përgjatë një rrjeti kabllosh prej rreth tetë kilometrash. Ndërkohë, në majë të saj do të shkëlqejë ylli ikonik “Swarovski”, i cili peshon rreth 408 kilogramë. Ceremonia tradicionale e ndezjes zyrtare të dritave, e cila do të përcillet direkt edhe përmes ekraneve televizive, është planifikuar të mbahet më 2 dhjetor. Vizitorët dhe banorët vendas do të kenë mundësinë ta admirojnë pemën e festave deri më 9 janar 2027. Ky ritual festiv në “Rockefeller Center” i ka fillesat në vitin 1931, kur ndërtuesit e kompleksit ngritën një bredh modest të dekoruar me zbukurime të punuara vetë, ndërsa ceremonia e parë zyrtare u organizua dy vjet më vonë, në 1933. Me të përfunduar sezoni i festave, trungu i këtij bredhi do të shërbejë për qëllime humanitare. Ai do të përpunohet në lëndë drusore dhe do t'i dhurohet organizatës jofitimprurëse “Habitat for Humanity” për ndërtimin e shtëpive. Përmes kësaj nisme, pema e njohur e Nju Jorkut nuk mbetet vetëm një emblemë e gëzimit të Krishtlindjeve, por shndërrohet edhe në një ndihmë konkrete për familjet në nevojë për strehim.