Homazhe në Prishtinë: Maqedonci përkulet para kujtimit të ushtarëve britanikë të rënë për lirinë e Kosovës

Ministri i Mbrojtjes, Ejup Maqedonci, ka zhvilluar sot një ceremoni homazhesh pranë pllakës përkujtimore të ushtarëve britanikë, e cila ndodhet në sheshin “Edith Durham” në kryeqytet. Përmes një publikimi në rrjetet sociale, kreu i mbrojtjes njoftoi se në këtë ngjarje solemne morën pjesë personalitete të larta të institucioneve vendase, si dhe përfaqësues të partnerëve ndërkombëtarë. Me këtë rast, Maqedonci ka evokuar kujtimin e 14 trupave britanikë që ndërruan jetë gjatë misionit të tyre në Kosovë, si dhe të rreth 150 ushtarakëve të tjerë nga shtete të ndryshme të botës, të cilët sakrifikuan jetën për të garantuar paqen dhe stabilitetin në rajon. “Katërmbëdhjetë ushtarët britanikë që humbën jetën gjatë shërbimit në Kosovë, së bashku me rreth 150 ushtarë të tjerë nga vende të ndryshme, janë dëshmi e sakrificës së përbashkët për paqen dhe sigurinë në vendin tonë”, ka shkruar Maqedonci.