E ardhmja e Arman Durmishit: Çfarë thonë rregullat e FIFA-s për sulmuesin e Juventusit dhe Shqipërinë?

Talenti i Juventusit, Arman Durmishi, vazhdon të jetë larg ekipeve kombëtare të moshave të Shqipërisë, një mungesë kjo që daton që nga muaji mars i këtij viti. Për të tretën herë radhazi, 18-vjeçari nuk është përfshirë në listat e grumbullimeve të kuqezinjve, pasi preferon të mbetet i fokusuar te angazhimet e tij me skuadrën e të rinjve të klubit torinez. Kohët e fundit, mediat kanë lënë të kuptohet se përfaqësuesja U-21 e Sllovenisë ka shprehur interesim të theksuar për shërbimet e tij, duke nxitur aludimet për një kalim të mundshëm. Megjithatë, një skenar i tillë është i pamundur, pasi rregulloret e FIFA-s e ndalojnë përfundimisht një ndryshim të tillë federate për sulmuesin. Fakti që ai jo vetëm që e ka kryer më parë kërkesën për ndryshimin e shoqatës së futbollit, por ka aktivizuar edhe ndeshje zyrtare me fanellën kuqezi, e mban të lidhur ngushtë me Shqipërinë. Pavarësisht se ka lindur në Slloveni dhe gëzon shtetësinë sllovene, këta faktorë nuk mjaftojnë për të anashkaluar përcaktimet strikte të shtëpisë së madhe të futbollit botëror. Në këtë mënyrë, FIFA ka qartësuar pozitat e lojtarit, ndërkohë që kujtojmë se Shqipëria ka pësuar një largim në repartin e sulmit gjatë këtij muaji, ku Enis Rexhepi vendosi t'i bashkohet Përfaqësueses së Kosovës pas ftesës së marrë nga trajneri Foda për ekipin e parë.