Kombëtarja U-19 zbulon listën, Tafaj: Besim i plotë te ky grup, synojmë pikët maksimale

Trajneri i Përfaqësueses U-19 të Shqipërisë, Fatjon Tafaj, ka shpjeguar detajet lidhur me përzgjedhjen e lojtarëve për fazën e dytë të Kampionatit Europian, ku kuqezinjtë do të matin forcat me Qipron dhe Armeninë. Gjatë prononcimit të tij, tekniku i njohur vlerësoi lart nismën për aktivizimin e talenteve në Abissnet Superiore dhe Kategorinë e Parë, duke bërë të ditur se në listë figurojnë nëntë futbollistë që aktivizohen në kampionatin vendor, çka ka ndikuar ndjeshëm në formën e tyre fizike falë minutazhit të fituar në ekipet e para. “Kemi grumbulluar lojtarët më të mirë. Këtu dua të fus edhe pjesën e projektit që është zbatuar nga Abissnet Superiore dhe Kategoria e Parë, ku ne kemi grumbulluar nëntë lojtarë, gjë që Kombëtaren U-19 e ka ndihmuar goxha shumë për shkak të minutazhit që kanë marrë në ekipin e parë. Minutazhi ka ardhur në rritje dhe kjo është diçka që ne na ka ndihmuar”, – u shpreh Tafaj. Megjithatë, stafi teknik është dashur të bëjë llogaritë pa disa prej elementëve kyçë për shkak të problemeve shëndetësore, megjithëse zëvendësimet janë kryer duke ruajtur të njëjtat standarde dhe profile taktike në skuadër. “Për sa i përket ekipit në total, kemi tre mungesa, që janë mungesa për arsye shëndetësore. Janë dy lojtarë, njëri nga ata ka pësuar një dëmtim në grumbullimin e fundit si Shehi. Është kapiteni Gecaj, i cili ka një tërheqje në kofshë, dhe i fundit është Armir Borici, lojtari i AF Elbasanit, i cili ka pësuar një dëmtim muskular. Të tre lojtarët janë zëvendësuar nga tre lojtarë të tjerë, të cilët kanë karakteristika pothuajse të njëjta me lojtarët që na mungojnë”, – theksoi ai. Duke analizuar potencialin e grupit dhe sfidat që e presin në këtë turne, trajneri kuqezi ka shprehur optimizëm të patundur për paraqitjen e skuadrës, duke kërkuar angazhim maksimal për të arritur rezultate pozitive. “Sigurisht, do të shkojmë dhe do të bëjmë maksimumin për këtë turne. Është mënyra e vetme që ne të bëjmë më të mirën atje. Unë e kam shprehur edhe më përpara që grupi që kemi është me shumë cilësi. Duke pasur shumë cilësi, edhe pritshmëritë rriten. Unë kam shumë besim te grupi dhe do të mundohemi që të bëjmë më të mirën atje për të marrë maksimumin e pikëve që kemi”, – vijoi Tafaj. Duke folur për nivelin e kundërshtarëve, ai ka kërkuar përqendrim maksimal, duke shtuar se puna përgatitore ka nisur prej kohësh në bashkëpunim të ngushtë me stafin. “Kur flitet për ekipin Kombëtar, nuk mund të thuhet që është ekip i lehtë apo i vështirë. Të gjitha ekipet janë të vështira. Kështu që, duhet të kemi parasysh që të bëjmë më të mirën, për t’i marrë më të mirën ndeshjeve. Bashkë me stafin i kemi analizuar të dyja ndeshjet. Kemi një muaj që merremi me analizën e kundërshtarit. Janë dy kundërshtarë që kanë specifika të ndryshme. Ne jemi përgatitur për të bërë më të mirën në këtë turne që kemi këto dy ndeshjet”, – përfundoi Fatjon Tafaj. Përfaqësuesja e Shqipërisë U-19 do të zbresë në fushë më 11 nëntor për t'u përballur me Qipron, ndërsa tre ditë më vonë, më 14 nëntor, do të luajë kundër Armenisë. Të dyja takimet do të nisin në orën 13:30 dhe do të zhvillohen në “Sotira Municipal Stadium”, në kuadër të raundit të dytë të Kampionatit Europian U-19, Liga B.