Hetimet e SPAK për “Albanian Files”, Ina Zhupa: Ky botim do të dërgojë Edi Ramën në qeli

Deputetja e Partisë Demokratike, Ina Zhupa, ka dalë në një reagim zyrtar pasi Prokuroria e Posaçme (SPAK) konfirmoi nisjen e hetimeve lidhur me librin e saj të titulluar “Albanian Files”, i cili u promovua zyrtarisht më 24 qershor 2026. Që në momentin e parë të prezantimit, ajo kishte paralajmëruar se ky botim do të shërbente si një dosje inkriminuese për organin e akuzës dhe do të prodhonte përgjegjësi ligjore për kryeministrin Edi Rama. Sipas ligjvënëses demokrate, ky libër sjell në vëmendje 523 projekte ndërtimi të hartuara nga studio prestigjioze ndërkombëtare, për të cilat ngrihen dyshime serioze. Hetimi, sipas saj, duhet të zbardhë kriteret e përzgjedhjes, mungesën e garave të lira dhe transparente, paracaktimin e fituesve, si dhe përshtatjen e ligjeve me porosi sipas orekseve të investitorëve preferencialë. Zhupa ka theksuar se gjatë kësaj periudhe territori i vendit është keqpërdorur si një pronë për t'u ndarë mes klientelës, ndërsa mekanizmat shtetërore dhe ligjore janë vënë në shërbim të grupeve të caktuara të interesit. Ajo ka shtuar se prova e vërtetë për SPAK-un nuk qëndron te regjistrimi formal i procedimit, por te finalizimi i tij deri në fund, duke u shprehur e bindur se nëse ky hetim ndiqet me seriozitet, “Albanian Files” do të jetë dosja që do ta çojë Edi Ramën në burg.