Mourinho ashpër ndaj La Ligës: Këto lojëra bëjini diku tjetër, lojtarët nuk janë makineri

Pavarësisht se Real Madridi triumfoi me rezultatin e pastër 3-0 në udhëtimin ndaj Valencias, trajneri José Mourinho ka zgjedhur të mos e fshehë zhgënjimin e tij të madh ndaj drejtuesve të La Ligës. Strategu portugez ka vënë në shënjestër kalendarin e ngjeshur të ndeshjeve, duke e konsideruar këtë qasje si të padrejtë dhe të papranueshme për grupin e tij të lojtarëve. Sipas tij, skuadra është detyruar të përballet me një ritëm rraskapitës takimesh brenda një hapësire shumë të shkurtër kohe, duke rrezikuar fizikun e futbollistëve. “Shpresoj që La Liga t’ia bëjë këtë shaka dikujt tjetër dhe jo sërish neve. La Liga e Tebas ka pushtetin. Shpresoj vetëm që të mos përsërisin një veprim të tillë, pas kësaj maratone ndeshjesh që kemi pasur gjatë kësaj jave”, u shpreh Mourinho gjatë prononcimit të tij. Në vijim të fjalës, tekniku nga Setubal vuri theksin tek emergjenca e rikuperimit fizik, duke kërkuar më shumë ndjeshmëri ndaj ngarkesës që mbajnë mbi supe sportistët elitarë. “Lojtarët kanë nevojë për pushim”, përmbylli ai deklaratën e tij.