Alarmi nga ndërtimtaria: Sektori kyç i ekonomisë në krizë të thellë, zbulohen shkaqet dhe rritja drastike e çmimeve

Sektori i ndërtimit në Kosovë po kalon një periudhë tejet sfiduese, e cila rrezikon stabilitetin e kësaj industrie që konsiderohet shtylla kurrizore e zhvillimit ekonomik të vendit. Kështu ka bërë të ditur kryetari i Shoqatës së Ndërtimit në Kosovë (SHNK), Valon Vataj, sipas të cilit industria po përballet me ngecje të ndjeshme për shkak të rënies së fuqisë blerëse, mungesës së mjeteve financiare për mbylljen e projekteve dhe pasigurisë së krijuar në rrafshin institucional. Gjatë një interviste mediatike, Vataj ka theksuar se volumi i lartë i ndërtimeve, veçanërisht në kryeqytet, ka çuar në ngecjen e shumë nismave. Ai ka vënë inatin te situata politike e krijuar ndër vite dhe mungesa e një qartësie institucionale, elemente këto që kanë krijuar një hije dyshimi te investitorët dhe blerësit potencialë, duke thelluar edhe më tej gropën e krizës në këtë sektor jetik. Një nga faktorët kryesorë që ka diktuar rritjen e kostove të ndërtimit mbetet varësia e lartë nga importi i materialeve, të cilat janë shoqëruar me shtrenjtim të ndjeshëm në tregun ndërkombëtar. Kësaj i shtohen edhe ngritja e çmimit të derivateve, tarifat e larta të transportit, çmimet e papërballueshme të pronave dhe tokat për ndërtim, si dhe mungesa kronike e fuqisë punëtore të kualifikuar. Duke iu referuar ndryshimeve të çmimeve, kreu i SHNK-së ka bërë të me dije se në disa pozicione specifike të punimeve ndërtimore, rritja ka kapur shifra alarmante deri në 150 për qind. Sipas tij, statistikat zyrtare shpesh nuk pasqyrojnë realitetin e plotë për shkak të shkallës së informalitetit në treg, ndërsa theksoi se nuk pret një stabilizim apo ulje të çmimeve në të ardhmen e afërt. Sa i përket dinamikës së tregut të patundshmërisë në rang vendi, Vataj ka veçuar Prizrenin si një nga qytetet që po përballet me sfidën dhe krizën më të madhe në aspektin e shitblerjes së banesave. Pavarësisht zgjerimit urban dhe zhvillimit të hovshëm të ndërtimeve në këtë zonë, interesi real për blerje ka shënuar rënie, duke lënë pas një numër të lartë pronash të pashitura.