Treshja shqiptare startuese te Grasshoppersi, sfida kundër Lausanne-Sport mbyllet në barazim

Në kuadër të javës së 13-të të elitës së futbollit zviceran, Grasshoppersi ka regjistruar një barazim 1:1 në sfidën kundër Lausanne-Sportit, ndeshje në të cilën u dallua prania e tre futbollistëve shqiptarë që nisën takimin nga minuta e parë: kapiteni Amir Abrashi, Bujar Pllana dhe Samuel Krasniqi. Skuadra e Grasshoppersit arriti të zhbllokojë rezultatin në minutën e 29-të të takimit. Aksioni nisi nga krahu i djathtë përmes një krosimi të Morandit në drejtim të Samuel Krasniqit, i cili provoi goditjen me volej, por pa e kapur topin në mënyrën e duhur. Pavarësisht goditjes jo të plotë, topi mbeti në zonë dhe përfundoi në qendër, ku u shfrytëzua mjaft mirë nga Goudmijn, i cili e dërgoi saktësisht në rrjetë për t'i dhënë epërsinë skuadrës së tij prej 1:0. Kur ndeshja po shkonte drejt fundit dhe triumfit të mundshëm të vendasve, Lausanne-Sporti gjeti golin e barazimit në minutën e 85-të, kur Traore u tregua i saktë duke vendosur shifrat përfundimtare 1:1. Në minutën e gjashtë shtesë të kohës shtesë (90+6'), kapiteni i Kombëtares dhe i Grasshoppersit, Amir Abrashi, u ndëshkua me karton të verdhë nga gjyqtari i ndeshjes. Pas këtij rezultati të barabartë, Grasshoppersi pozicionohet në vendin e 10-të të klasifikimit me gjithsej 11 pikë të grumbulluara, ndërsa Lausanne-Sporti mbetet në vendin e 12-të me shtatë pikë.