Përleshje me thika në Vlorë: Policia detyrohet të qëllojë në ajër për të kapur të dyshuarin që u arratis

Një konflikt verbal mes disa shtetasve ka marrë kthesë të rrezikshme pasditen e sotme, duke degjeneruar në dhunë fizike në zonën e njohur si “Uji i Ftohtë” në qytetin bregdetar të Vlorës. Sipas informacioneve paraprake, situata ka tensionuar edhe më shumë kur njëri prej protagonistëve ka nxjerrë një mjet prerës (thikë), duke vënë në rrezik sigurinë e personave të tjerë të pranishëm. Reagimi i forcave të rendit ka qenë i menjëhershëm pas sinjalizimit për ngjarjen. Për të vënë nën kontroll situatën dhe për të ndalur njërin nga autorët e dyshuar që uikur me vrap për të shmangur kapjen, efektivët e policisë kanë shtënë me armë zjarri në ajër. Pavarësisht kësaj mase, i dyshuari ka vazhduar arratisjen në këmbë, por është neutralizuar dhe prangosur nga efektivët vetëm pak metra më larg. Ndërkaq, të gjithë individët e tjerë të përfshirë në këtë konflikt janë shoqëruar në ambientet e komisariatit për veprime të mëtejshme hetimore. Fatmirësisht, pavarësisht tensioneve dhe përdorimit të mjetit prerës, autoritetet konfirmojnë se nuk ka persona të lënduar nga kjo përplasje.