Tragjedia në Krakov: Detaje të reja tregojnë se sulmuesi ishte i pajisur si për operacion ushtarak

Autori i ngjarjes së rëndë ku mbetën të vrarë gjashtë persona në qendër të Krakov-it kishte veshur një uniformë kamuflazhi dhe, sipas burimeve vendase, mbante gjithashtu një jelek antiplumb gjatë kryerjes së sulmit. Kuba Jaloszyński, ish-specialist i policisë kundër terrorizmit, vlerëson se lloji i pajisjeve dhe armatimit dëshmon qartë se agresori ishte përgatitur paraprakisht për një sulm të përmasave të mëdha. Megjithatë, autoritetet policore ende nuk e kanë konfirmuar zyrtarisht përdorimin e jelekut balistik nga ana e tij. Katarzyna Cislo, zëdhënëse e policisë së Krakov-it, deklaroi për televizionin TVN24 se brenda automjetit të autorit u zbuluan disa armë zjarri dhe municione të ndryshme. Grupet e ekspertëve antieksploziv të policisë kanë kontrolluar detajisht veturën e sulmuesit. Deri më tani nuk janë bërë publike detaje mbi llojin specifik të armëve, sasinë e tyre apo mënyrën se si autori ka arritur t'i sigurojë ato. Ngjarja tragjike ndodhi rreth orës 15:00 në zemër të zonës historike të Krakov-it. Autori futi automjetin e tij në sheshin kryesor "Rynek Główny" dhe hapi zjarr ndaj qytetarëve të pafajshëm. Gjatë lëvizjes nëpër qytet, ai qëlloi edhe në drejtim të një tramvaji urban, duke dëmtuar xhamin e kabinës së shoferit. Si pasojë e breshërisë së plumbave, gjashtë persona humbën jetën dhe 15 të tjerë mbetën të plagosur. Forcat e rendit ndërhynë menjëherë duke plagosur autorin, i cili u arrestua dhe u dërgua në spital, ku po lufton për jetën. Gjatë shkëmbimit të zjarrit mbetën të plagosur edhe dy efektivë policie, njëri prej të cilëve mori tri plagë armësh dhe ndodhet në gjendje kritike. Autoritetet konfirmuan se i dyshuar është shtetas polak, ndërsa hodhën poshtë çdo spekulim për vrasjen e ndonjë polici apo ekzistencën e një sulmuesi të dytë në arrati. Identiteti i saktë i 25-vjeçarit nuk është bërë ende i njohur për publikun, ndërsa motivet e këtij akti mbeten ende të panjohura për hetuesit.