Magjia e Shirokës nuk zbehet kurrë: Liqeni i Shkodrës tërheq vizitorë vendas dhe të huaj në prag të dimrit

E njohur për pamjet e saj përrallore dhe atmosferën paqësore që ofron Liqeni i Shkodrës, Shiroka vazhdon të mirëpresë vizitorë të shumtë edhe në këto ditë të ftohta të pragut të dimrit, duke dëshmuar se turizmi atje nuk njeh kufij sezonalë. Ndërsa disa udhëtarë zgjedhin këtë bregdet liqenor për të shijuar horizontin e gjerë, të tjerë preferojnë një ecje qetësuese në natyrë për të marrë ajër të pastër dhe për t'i shpëtuar vrullit të përditshmërisë. “Jam nga Italia. Është hera e parë që vij. Kemi vizituar kështjellën Rozafa dhe këtu po më pëlqen shumë Liqeni. Jemi së bashku me familjen. Do të qëndrojmë katër ditë në Shkodër”, u shpreh njëri nga turistët e huaj. Një përshtypje të ngjashme ndan edhe një vizitore nga Belgjika, e cila ka zgjedhur Shirokën për herë të parë gjatë kësaj periudhe. “Jemi nga Belgjika, hera e parë që vij. Panorama këtu më pëlqeu shumë. Do qëndrojmë pak ditë”, tha ajo. Krahas të huajve, Shiroka mbetet një vendndodhje e zemrës për vetë banorët e Shkodrës. Për ta, ky nuk është thjesht një atraksion turistik, por një pjesë e rrënjosur thellë në kujtimet, traditën dhe shpirtin e qytetit. “Shiroka është e këndshme, e shfrytëzojmë kur jemi pushim. Është një destinacion i pëlqyer shumë nga të gjithë”, theksoi një qytetar vendas. Pavarësisht ndryshimit të motit dhe afrimit të stinës së ftohtë, Shiroka vijon të ruajë shkëlqimin e saj si një nga thesaret më të çmuara natyrore të Shkodrës, e cila vazhdon të zbulohet me kurreshtje e kënaqësi nga çdo vizitor.