Tensione para Kryeministrisë: Thirrjet kundër Berishës dhe Ramës acarojnë demokratët në protestë

Protesta e organizuar nga Partia Demokratike para selisë së Kryeministrisë është shoqëruar me incidentin e parë të shënuar gjatë tubimit të sotëm. Mospajtimet kanë nisur në momentin kur një nga protestuesit ka lëshuar thirrje të drejtuara ndaj dy krerëve kryesorë politikë, duke brohoritur hapur: “Rama n’burg, Berisha n’burg”. Menjëherë pas këtij veprimi, situata është tensionuar. Pjesëmarrës të tjerë të pranishëm në tubim e kanë kundërshtuar ashpër, duke e sulmuar verbalisht dhe fizikisht me shpulla, ndërkohë që në vendngjarje është dashur edhe ndërhyrja e qytetarëve të tjerë për të qetësuar gjakrat. Ky mbetet incidenti i parë i bërë publik gjatë zhvillimit të kësaj proteste të thirrur nga opozita përpara institucionit të Kryeministrisë.