Bashkatdhetarët në Teksas ngrenë zërin për UÇK-në: Drejtësia në Hagë është e padrejtë

Komuniteti shqiptar që jeton në Teksas ka organizuar një protestë domethënëse para ndërtesës së Kapitolit në Austin. Kjo lëvizje qytetare erdhi si kundërpërgjigje ndaj vendimit të fundit të Dhomave të Specializuara në Hagë për katër ish-udhëheqësit e Ushtrisë Çlirimtare të Kosovës, duke rikonfirmuar mbështetjen e palëkundur për luftën e drejtë çlirimtare të popullit të Kosovës. Protestuesit u mblodhën duke valëvitur flamujt e Shteteve të Bashkuara të Amerikës, Kosovës dhe Shqipërisë. Mesazhet e qarta të shkruara në pankarta, si “Not in My Name” (Jo në emrin tim) dhe “Freedom Has a Name: UÇK” (Liria ka emër: UÇK), përcollën mesazhin e unitetit dhe indinjatës së diasporës përballë zhvillimeve gjyqësore. Në foltoren e kësaj proteste u dëgjuan zërat e personaliteteve të njohura të komunitetit, përfshirë kryetarin e Komunitetit Shqiptaro-Amerikan në Teksas, Visar Visoka, veteranin e UÇK-së, Ekrem Hyseni, ish-kryetarin e komunitetit, Nazar Mehmeti, si dhe aktivistët Bruno Ceka, Ruzhdi Halili e Agim Halili. Gjithashtu, në këtë tubim mori pjesë dhe mbajti fjalim edhe zëvendëskryetari i Bashkisë së Wylie, Gino Mulliqi. Të gjithë folësit e cilësuan verdiktin e gjykatës si një vendim të padrejtë. Ata shprehën bindjen e tyre të fortë në procesin e apelimit dhe apeluan për një bashkërendim më të mirë të faktorit politik shqiptar, si në Kosovë ashtu edhe në diasporë, me qëllim mbrojtjen e vlerave dhe historisë së pastër të luftës për liri.