Limaj nga Mitrovica e Vushtrria: Institucionet duhet të marrin përgjegjësi për pasojat e aktgjykimit të Hagës

Kryetari i Nismës Socialdemokrate, Fatmir Limaj, ka intensifikuar takimet me strukturat partiake dhe mbështetësit e tij në Mitrovicë dhe Vushtrri. Këto bashkëbisedime, të zhvilluara nën temën “Kosova pas aktgjykimit të 16 shtatorit”, kanë pasur si fokus kryesor analizimin e situatës së re politike në vend. Gjatë këtyre takimeve, Limaj ka diskutuar mbi zhvillimet e fundit, duke vënë theksin te mbrojtja e vlerave të luftës së Ushtrisë Çlirimtare të Kosovës, ndikimin e vendimit të 16 shtatorit në Hagë, si dhe sfidat aktuale që lidhen me sigurinë, ekonominë dhe mirëqenien sociale të qytetarëve. Një nga çështjet që ka ngjallur shqetësim të thellë, sipas kreut të Nismës, është mënyra e trajtimit të Ligjit për Dhomat e Specializuara dhe rikthimi i tij në agjendën e Kuvendit të Kosovës. “Për këto çështje qytetarët dhe shoqëria jonë kërkojnë qartësi, përgjegjësi dhe qëndrime të vendosura”, ka deklaruar Limaj. Sipas tij, pasojat që rrjedhin nga aktgjykimi i 16 shtatorit nuk duhet të shihen si çështje individuale të të akuzuarve, por si fenomene që cenojnë drejtpërdrejt dinjitetin e luftës për liri dhe themelet mbi të cilat është ngritur shteti i Kosovës. Për këtë arsye, ai ka bërë thirrje për një debat serioz institucional, duke kërkuar që interesat partiake të lënë hapësirë për interesin shtetëror. Duke kërkuar një qasje më aktive nga krerët e shtetit, Limaj ka nënvizuar se institucionet duhet të jenë në nivelin e detyrës për të mbrojtur interesat e qytetarëve. Ai ka bërë të ditur se ky cikël takimesh do të vazhdojë edhe në qytete të tjera, me qëllim dëgjimin e drejtpërdrejtë të shqetësimeve qytetare. “Kosovës i duhet përgjegjësi, vendosmëri dhe veprim. Kosova është atdheu ynë, amaneti ynë dhe përgjegjësia jonë ndaj brezave që vijnë”, përfundoi Limaj mesazhin e tij para aktivistëve dhe bashkëpunëtorëve në këto dy qytete.