Protestë gjithëkombëtare në Prishtinë: Kërkohet drejtësi për Arlinda Zekajn dhe dorëheqja e krerëve institucionalë

Këtë të shtunë, kryeqyteti do të bëhet sërish arenë e një proteste masive me kërkesën për drejtësi lidhur me vrasjen e rëndë të Arlinda Zekajt. Tubimi pritet të nisë në orën 12:00 para katedrales “Nënë Tereza”, ku organizatorët kanë bërë thirrje që qytetarët të bashkohen për të denoncuar dhunën ndaj grave dhe dështimin e sistemit në mbrojtjen e tyre. Kolektivi për Mendim dhe Veprim Feminist, përmes një njoftimi, ka theksuar se vrasja makabre e Zekajt ka nxjerrë në pah një zinxhir të dështuar institucional. Sipas tyre, institucionet jo vetëm që nuk po ofrojnë mbrojtje për gratë që raportojnë rrezik, por përmes neglizhencës, po i shndërrohen në bashkëfajtore të vrasjeve. “Kjo ngjarje dhe reagimi i vakët shtetëror e kanë futur shoqërinë tonë në një krizë pasigurie, e cila mund të kapërcehet vetëm përmes marrjes së përgjegjësisë së plotë nga shteti”, deklaruan organizatorët. Arlinda Zekaj u privua nga jeta në mënyrë barbare me sëpatë në shtëpinë e saj në Pejë, nga ish-kunati i saj. E ndjera kishte adresuar më herët letra drejtuar organeve të drejtësisë, duke paralajmëruar se jeta e saj ishte në rrezik, megjithatë, kërkesat e saj për ndihmë mbetën të shpërfillura. Megjithëse deri më tani janë ndërmarrë masa disiplinore ndaj disa zyrtarëve, protestuesit kërkojnë përgjegjësi direkte nga nivelet më të larta vendimmarrëse. Lista e kërkesave të protestuesve është e qartë dhe përfshin shkarkimin e ministrave Xhelal Sveçla dhe Donika Gërvalla, si dhe dorëheqjen e kryetarit të Komunës së Pejës, Gazmend Muhaxheri. Gjithashtu, kërkohet shkarkimi, ndjekja penale dhe burgosja e një sërë zyrtarësh të sistemit të drejtësisë dhe sigurisë, përfshirë kryeprokuroren Lumturije Vuçetaj, prokuroren Suada Rama Hamza, kryetarin e gjykatës Shemsedin Haxhiaj, gjykatësin Migjen Kastrati, ushtruesen e detyrës së drejtores së QPS-së Shpresa Lukaj dhe togerin Faruk Muqolli. Ndër kërkesat e tjera urgjente të protestuesve janë shpallja e femicidit si urgjencë kombëtare, sigurimi i banimit social për gratë e mbijetuara nga dhuna, vetingu i pavarur dhe apartiak i sistemit të drejtësisë, si dhe legalizimi i sprejit vetëmbrojtës për gratë. Me këtë marshim, aktivistët synojnë t’i japin fund dhunës së shumëfishtë dhe të garantojnë një ambient më të sigurt për çdo vajzë e grua në Kosovë.