Rreziku në WhatsApp: Autoriteti për Sigurinë Kibernetike jep alarmin për vjedhjen e llogarive

Autoriteti Kombëtar për Sigurinë Kibernetike (AKSK) ka lëshuar një njoftim urgjent për të gjithë përdoruesit e aplikacionit WhatsApp në Shqipëri. Ky paralajmërim vjen si pasojë e shtimit të rasteve të komprometimit të llogarive në vendet e rajonit, ku shumë qytetarë kanë humbur kontrollin mbi profilet e tyre personale. Ekspertët e sigurisë kibernetike po analizojnë metodat e përdorura nga keqbërësit për të depërtuar në llogaritë e përdoruesve. Sipas autoriteteve, shkak kryesor për këtë situatë janë bërë mashtrimet përmes kodeve të verifikimit dhe dërgimi i lidhjeve (links) me përmbajtje të dyshimtë. Për këtë arsye, qytetarët këshillohen të tregojnë vigjilencë të lartë gjatë përdorimit të platformës. Për të garantuar sigurinë e llogarisë suaj, AKSK këshillon zbatimin e këtyre hapave thelbësorë: 1. Aktivizoni opsionin e verifikimit me dy hapa (Two-step verification) përmes menysë Settings → Account. 2. Ruajeni konfidencialitetin e kodeve të verifikimit dhe të dhënave personale; mos ia ndani ato askujt. 3. Monitoroni rregullisht seksionin “Linked Devices” dhe hiqni aksesin për çdo pajisje që nuk e keni autorizuar vetë. 4. Shmangni klikimin e linqeve të dyshimta që vijnë përmes SMS-ve, email-eve apo mesazheve në WhatsApp, veçanërisht kur kërkohet verifikimi i llogarisë. 5. Nëse merrni njoftime për regjistrim të WhatsApp-it në pajisje të panjohura, mos e ndani kodin dhe mos e konfirmoni kërkesën. 6. Siguroni adresën e email-it të lidhur me llogarinë tuaj duke përdorur një fjalëkalim të fortë dhe autentikim me shumë faktorë. Në rast të humbjes së aksesit, institucioni thekson se duhet të ndiqen vetëm procedurat zyrtare të rikuperimit të ofruara nga vetë WhatsApp-i. AKSK nënvizon se kodi i verifikimit është personal dhe, edhe nëse kërkesa duket se vjen nga një mik apo i njohur, është e domosdoshme të kryhet një verifikim shtesë përpara se të ndërmerrni çdo veprim.