Sukses i jashtëzakonshëm i FSK-së në Akademinë prestigjioze amerikane West Point

Kadetët e Qendrës për Studime Universitare (QSU) kanë shënuar arritje të jashtëzakonshme në konferencën ndërkombëtare “SCUSA 77”, e cila është zhvilluar nën organizimin e Akademisë Ushtarake West Point në Shtetet e Bashkuara të Amerikës. Lajmi është bërë i ditur nga ministri i Mbrojtjes, Ejup Maqedonci, i cili ka theksuar se përfaqësuesit e Kosovës janë pozicionuar në treshen e grupeve më të suksesshme sa i përket memorandumit të përgatitur për temat e mbrojtjes dhe sigurisë. Krahas suksesit akademik, kadetët e QSU-së kanë dominuar edhe në aspektin fizik, duke u stolisur me vendin e parë në garat e zhvilluara. Sipas ministrit Maqedonci, këto rezultate kulminante pasqyrojnë shkallën e lartë të përgatitjes dhe dëshmojnë domosdoshmërinë e investimeve afatgjata në arsimimin dhe ngritjen profesionale të brezave të rinj brenda Forcës së Sigurisë së Kosovës.