Rrëfimi tronditës i vrasësit serial në Greqi: Kam kryer edhe dy ekzekutime të tjera në Shqipëri

Detaje të reja tronditëse kanë dalë në dritë pas prangosjes në Athinë të shtetasit shqiptar Nikolin Pali, i cili ishte shpallur në kërkim prej gjashtë vitesh për një vrasje të dyfishtë të ndodhur në Loutraki të Greqisë. Autoritetet helene bëjnë me dije se gjatë marrjes në pyetje, 43-vjeçari dyshohet se ka pranuar se është autor i dy krimeve të tjera të rënda të kryera në territorin shqiptar. Pali u lokalizua dhe u arrestua brenda një banese në lagjen Kato Patisia të kryeqytetit grek, në saje të një operacioni të ndërmarrë nga forcat speciale EKAM dhe Policia e Shtetit. Ai kishte mbi supe një dënim në mungesë për eliminimin me sëpatë të ish-partneres së tij, një 43-vjeçareje me origjinë nga Ukraina, si dhe të partnerit të saj, një farmacisti grek. Sipas burimeve hetimore, hetuesit po analizojnë mundësinë e përfshirjes së tij edhe në ngjarje të tjera kriminale, duke përfshirë këtu dyshimet për vrasje me pagesë. Gjatë bastisjes së ambientit ku po fshihej, efektivët grekë sekuestruan një armë zjarri pistoletë, dy granata luftarake, dy mekanizma ndezës, tre palë pranga dhe një lejeqëndrimi të falsifikuar që mbante fotografinë e tij. Skema e tij kriminale përfshin akuza të rënda për vrasje me dashje, grabitje me armë dhe zjarrvënie të qëllimshme. Përmes bashkëpunimit ndërkombëtar me Interpolin, është konfirmuar se 43-vjeçari kërkohej gjithashtu nga drejtësia në Shqipëri për një tentativë grabitjeje me armë të kryer në bashkëpunim. Krim i tmerrshëm për të cilin ai ishte dënuar në Greqi u regjistrua natën mes 10 dhe 11 tetorit 2020, në një vilë pushimi në Loutraki. Hetimet e deritanishme tregojnë se autori ka sulmuar brutalisht me sëpatë viktimat, duke i lënë të vdekur në vend, ndërsa më pas është larguar pasi ka grabitur para dhe orendi bizhuterish. Për të humbur gjurmët, ai ka marrë automjetin e gruas dhe e ka djegur atë plotësisht në një zonë të braktisur. Në kuadër të këtij operacioni, policia ka vënë në pranga edhe një 41-vjeçare shqiptare, e cila dyshohet se e ka strehuar autorin dhe ka rënë ndesh me legjislacionin për të huajt. Ndërkohë, grupi hetimor vijon verifikimet intensive për të zbuluar nëse 43-vjeçari ka lënë pas gjurmë të krimeve të tjera të pazbardhura si në Greqi ashtu edhe në Shqipëri.