Mickoski pas Raportit të KE-së: Kemi progres të dukshëm, por pozicioni ynë për ndryshimet kushtetuese nuk lëviz

Kryeministri i Maqedonisë së Veriut, Hristijan Mickoski, ka komentuar sot gjetjet e Raportit të Komisionit Evropian, duke bërë të ditur se qasja e ekzekutivit ndaj çështjes së ndryshimeve kushtetuese vazhdon të mbetet e njëjtë, pavarësisht vlerësimeve pozitive për vendin. Kreu i Qeverisë vuri në dukje se edhe euroambasadori Michalis Rokas ka konfirmuar se, në raport me periudhën e kaluar, shteti ka shënuar hapa para këtë vit. "Vetë ambasadori dje në konferencën për shtyp tha se, në thelb, krahasuar me raportin e vitit të kaluar, këtë vit kemi përparim të konsiderueshëm. Por, është gjithashtu e rëndësishme të thuhet se periudha raportuese nuk i përfshin reformat që tashmë janë realizuar ndërkohë dhe ato që do të realizohen deri në fund të vitit, veçanërisht kur bëhet fjalë për luftën kundër korrupsionit dhe sundimin e së drejtës. Pres që vitin e ardhshëm të kemi një raport edhe më të fuqishëm, me të cilin do të konfirmohen përpjekjet e kësaj Qeverie dhe ambicia për të qenë në thelb një Qeveri reformuese", u shpreh ai. Duke u ndalur te çështja e amendamenteve kushtetuese, Mickoski theksoi se pozicioni qeveritar është i prerë, ndërsa fajësoi qeverisjen e kaluar për sfidat aktuale. "Sa u përket ndryshimeve kushtetuese, qëndrimi ynë si Qeveri është i qartë dhe mbetet i pandryshuar. Fatkeqësisht, për shkak të aventurave politike dhe politikës antishtetërore të qeverisë së mëparshme të LSDM-së dhe Bashkimit Demokratik për Integrim, ne tani kemi një kusht politik që janë ndryshimet kushtetuese", deklaroi kryeministri. Sipas tij, Maqedonia e Veriut përbën ndoshta rastin e vetëm ku, krahas detyrimeve për reforma substanciale, shteti ballafaqohet edhe me kushtëzime shtesë politike. "Por, kjo është situata. Ne po zhvillojmë dialog me fqinjin tonë lindor. Shpresoj që ky dialog në fund të japë rezultate dhe të mund të flasim për një proces që më në fund, pas 21 vjetësh nga marrja e statusit të vendit kandidat dhe 26 vjetësh nga nënshkrimi i Marrëveshjes së Stabilizim-Asociimit, të mund ta fillojmë procesin e negociatave", përfundoi Mickoski.