Brukseli paralajmëron TikTok: Algoritmi juaj po dëmton rëndë shëndetin mendor të përdoruesve

Komisioni Evropian ka bërë të ditur ditën e sotme se, sipas një vlerësimi paraprak, platforma e njohur e videove TikTok ka rregulla të Aktit të Shërbimeve Digjitale. Shkak për këtë janë bërë të ashtuquajturat "vrima lepuri", fenomene këto që mbajnë të mbërthyer pas ekranit audiencën për periudha të gjata kohore. Seksioni i personalizuar "Për ty" i këtij rrjeti social furnizon vazhdimisht shikuesit me materiale të përshtatura sipas shijeve të tyre. Në momentin që një individ interesohet apo reagon ndaj një zhanri të caktuar, sistemi automatik përshkallëzon menjëherë rekomandimet për materiale të ngjashme. Pasojë e kësaj dinamike është izolimi i njerëzve në internet për orë të tëra, duke humbur çdo koncept të kohës, një gjendje që njihet gjerësisht si "vrimë lepuri". Këto mekanizma mund të kenë pasoja mjaft negative për mirëqenien mendore, sidomos te të rinjtë dhe grupet më të ndjeshme të shoqërisë. "Sa herë që një përdorues shfleton përmbajtjen ose i pëlqen një videoje në TikTok, algoritmi i shërben atij më shumë nga ajo përmbajtje, duke e tërhequr atë në 'vrima të lepurit' nga të cilat nuk është e lehtë të dalësh", u shpreh zëvendëspresidentja Ekzekutive e Sovranitetit të Teknologjisë Henna Virkkunen. Institucioni evropian ka dalë në konkluzionin paraprak se drejtuesit e TikTok kanë dështuar të analizojnë siç duhet mënyrën se si mekanizmi i sugjerimeve i tërheq njerëzit drejt këtyre kurtheve dixhitale, duke cenuar kështu sigurinë dhe shëndetin e tyre. Megjithëse nga ana e TikTok janë ndërmarrë disa hapa për të zbutur ndikimin e këtij fenomeni të njohur si "zhytje e thellë", Komisioni vlerëson se këto masa mbeten ende të pamjaftueshme. Në bazë të qëndrimit zyrtar, platforma duhet t'i japë përparësi dëshirave të shprehura qartë nga vetë individët, të mos e përdorë kohën e kaluar duke parë video si metrikë për sugjerime të reja, të bëjë më të lehtë përdorimin e opsioneve kontrolluese, si dhe t'i nënshtrohet kontrolleve të herëpahershme të kodit të saj. Nëse ky vlerësim paraprak do të vërtetohet në fund, organet e Bashkimit Evropian mund të shpallin shkeljen e normave, gjë që rrezikon të sjellë gjobë financiare. Vlera e gjobës do të përcaktohet në përputhje me natyrën, peshën, përsëritjen dhe kohëzgjatjen e thyerjes së rregullave, duke arritur deri në 6 për qind të qarkullimit vjetor financiar të kompanisë në nivel global. Ndërkohë, TikTok ka marrë mundësinë zyrtare që të studiojë dokumentacionin e dosjes hetimore të përgatitur nga Komisioni dhe të paraqitë parashtresat e veta me shkrim ndaj konstatimeve paraprake.