Kurti për Ditën e Boshnjakëve: Komuniteti boshnjak, shtyllë e rëndësishme e shtetndërtimit në Kosovë

Kryeministri i Kosovës, Albin Kurti, ka përcjellë urimet e tij me rastin e Ditës së Boshnjakëve, duke vënë theksin te rëndësia historike e 28 shtatorit 1993. Kjo datë shënon momentin kur populli boshnjak riktheu emërtimin e tij kombëtar “Bošnjak”, si dhe zyrtarizoi gjuhën e tij amtare si “bosanski jezik”. Sipas kreut të qeverisë, kjo ditë nuk është vetëm një shënim kalendarik, por një gurthemel për mbrojtjen e identitetit, kulturës dhe gjuhës boshnjake. Ai ka vlerësuar lart rolin e këtij komuniteti në shoqërinë kosovare, duke e cilësuar atë si një kontribut të vyer për zhvillimin e vendit tonë të përbashkët. “Qeveria e Kosovës shpreh mirënjohjen e thellë për bashkëpunimin e vazhdueshëm dhe përpjekjet e komunitetit boshnjak për një të ardhme më të mirë në Kosovë”, ka deklaruar Kurti, duke nënvizuar se ky komunitet është pjesë integrale e jetës institucionale dhe vendimmarrëse në shtetin tonë. Në mesazhin e tij, kryeministri ka bërë një lidhje të pashmangshme historike mes Kosovës dhe Bosnje-Hercegovinës. Ai ka kujtuar se të dyja palët janë përballur me sfida të mëdha gjatë viteve ’90, duke përfshirë politikat agresive, krimet kundër njerëzimit, spastrimin etnik dhe gjenocidin, përvoja këto që kanë formësuar ndërgjegjen e përbashkët për liri dhe drejtësi.