Afera e 'Alta Bankës': LSDM ngre akuza të rënda ndaj Mickoskit dhe Sllaveskit, paralajmëron përgjegjësi ligjore

Lidhja Social Demokrate e Maqedonisë (LSDM) ka lëshuar akuza të ashpra ndaj liderit të VMRO-DPMNE-së, Hristijan Mickoski, si dhe ndaj Trajko Sllaveskit, lidhur me situatën me "Alta Bankën". Përmes një deklarate për mediat, opozita thekson se të dy këta politikanë do të përballen me përgjegjësi të plotë para organit të drejtësisë për humbjet e mundshme financiare. Sipas LSDM-së, dy opsionet e paraqitura nga Mickoski janë krejtësisht të paqëndrueshme. Optioni i parë, ai i gjetjes së një blerësi të ri për bankën, konsiderohet i pamundur pasi asnjë institucion serioz financiar nuk do të pranonte të blinte një portofol me prejardhje të dyshimtë. Partia nëvizon se banka zotërohet nga një person i cili deri dje administronte një zyrë të vogël këmbimi valutor në Zemun, ndërsa ndaj institucionit po zhvillohen hetime zyrtare në Serbi, Mal të Zi dhe në Bashkimin Evropian, çka ia ka shkatërruar tërësisht reputacionin. Sa i përket skenarit të dytë, atij të falimentimit pas heqjes së licencës në Serbi, LSDM-ja akuzon Mickoskin për fshehje të së vërtetës ndaj opinionit publik. Edhe pse premtohet se depozituesit janë të sigurt, opozita sqaron se qytetarët do të mund të rikuperojnë vetëm shumat e siguruara deri në 30,000 euro përmes Agjencisë së Sigurimit të Depozitave, ndërsa pjesa tjetër e mjeteve mbetet në pikëpyetje. Shqetësimi kryesor i ngritur nga LSDM-ja lidhet me paratë e ndërmarrjeve publike të Maqedonisë së Veriut që ndodhen në këtë bankë. Partia pyet publikisht se sa është vlera e fondeve të shtetit që rrezikojnë të humbasin dhe mbi çfarë baze ligjore pretendohet se ato do të mblidhen nga masa e falimentimit. Si shembull ilustrues përmendet se në "Alta Banka" pretendohej se ekzistonin afërsisht 400 milionë euro në thesar, por më pas doli se ato mjete financiare ishin tërhequr tashmë nga drejtuesi Matsura. LSDM-ja përfundon duke kërkuar llogaridhënie të menjëhershme dhe transparencë për të gjitha paratë e qytetarëve të bllokuara në këtë institucion. Partia nëvizon se fshehja e shifrave nuk mund të vazhdojë më dhe se i vetmi variant i sigurt është përballja 100% e Mickoskit dhe Sllaveskit me drejtësinë.