Goditje e rëndë karteleve të drogës në Spanjë: Sekuestrohen 10 tonë kokainë, hetimet fokusohen te rrjeti shqiptar

Autoritetet spanjolle kanë shënuar një sukses të madh në luftën kundër narkotikëve, pas zbulimit të mbi 10 tonëve kokainë në qytetin Águilas. Operacioni i gjerë policor ka vënë në shënjestër një organizatë të fuqishme kriminale me origjinë shqiptare, e cila dyshohet se përdorte dy kapanone industriale si pika kyçe për logjistikën dhe shpërndarjen e lëndës narkotike drejt tregjeve evropiane. Zbulimi ka ndodhur në zonën industriale 'El Labradorcico', krejt rastësisht, kur një paletë e ngarkuar me drogë u rrëzua gjatë procesit të shkarkimit. Përplasja bëri që pakot e kokainës të shpërndaheshin në dyshemenë e objektit, duke detyruar punëtorët e pranishëm të largohen me shpejtësi, duke braktisur mjetet e tyre të punës. Kur patrulla e Policisë Bashkiake mbërriti në vendngjarje, pas njoftimit për një aksident të mundshëm në punë, gjeti ambientet të braktisura. Pas inspektimit të detajuar të hapësirave, hetuesit zbuluan se sasia e drogës ishte shumë më e madhe se ç’dukej fillimisht. Pasi u kontrollua edhe një kapanon i dytë, sasia totale e sekuestruar tejkaloi shifrën e 10 tonëve, me një vlerë tregu që përllogaritet të jetë mbi 100 milionë euro. Në kapanonin e parë u gjetën rreth 5 tonë, ndërsa pjesa tjetër u zbulua në ambientin dytësor. Një element thelbësor që po u shërben hetuesve të Njësisë për Luftën kundër Krimit të Organizuar dhe Trafikut të Drogës janë adresat e shënuara mbi kutitë e kokainës. Këto shënime janë bërë prova kyçe për të zbardhur hartën e shpërndarjes dhe për të identifikuar krerët e organizatës që qëndron pas këtij trafiku të sofistikuar ndërkombëtar.