Rashford thur elozhe për Lamine Yamal: E krahasoi me Messin dhe parashikoi 'Topin e Artë'

Sulmuesi i Manchester United, Marcus Rashford, ka thyer heshtjen për herë të parë pas largimit nga Barcelona, duke ndarë vlerësime të larta për ish-bashkëlojtarin e tij, Lamine Yamal. Gjatë një bashkëbisedimi me tifozët në 'Old Trafford', anglezi nuk i kurseu komplimentet për 19-vjeçarin, duke e vënë atë në një nivel të krahasueshëm me legjendën Lionel Messi. Rashford zbuloi se në momentet e fundit para se të largohej nga klubi katalunas, ai ia kishte bërë të qartë Yamal se talenti i tij tejkalon çdo lojtar tjetër me të cilin ka ndarë fushën. Sipas sulmuesit, aftësitë teknike të adoleshentit janë të pashembullta për moshën që ka, duke e cilësuar atë si lojtarin që i është afruar më së shumti standardeve të vendosura nga Messi ndër vite. Duke parë potencialin e jashtëzakonshëm të yllit të ri, Rashford parashikon një karrierë të lavdishme për të. Ai shkoi aq larg sa të deklaronte se nuk do të befasohej aspak nëse Yamal do të arrinte të fitonte shtatë herë çmimin prestigjioz, 'Topi i Artë'. Megjithatë, Rashford tregoi respekt maksimal për ikonën argjentinase, duke theksuar se Messi mbetet një fenomen i papërsëritshëm. 'Messi është gjeni. Ndoshta nuk do të shohim më kurrë një futbollist kaq të kompletuar gjatë jetës sonë', përfundoi deklaratën e tij sulmuesi i Manchester United.