Polonia bëhet superfuqi e arit: Rezervat arrijnë në 700 tonë, radhitet mes 10 shteteve më të pasura në botë

Polonia ka shënuar një sukses të jashtëzakonshëm në politikat e saj monetare, duke arritur kuotën e 700 tonëve ari në rezervat e saj shtetërore. Me këtë hap, shteti polak është pozicionuar zyrtarisht në dhjetëshen e vendeve që zotërojnë sasinë më të madhe të metalit të çmuar në nivel global. Lajmi është konfirmuar nga kreu i Bankës Kombëtare të Polonisë, Adam Glapinski. Sipas tij, ky akumulim strategjik nuk është thjesht një shifër, por një garanci për besueshmërinë dhe sigurinë financiare të vendit, duke shërbyer njëkohësisht si një mburojë e fortë për stabilitetin e monedhës kombëtare, zloty. Ky progres është mjaft domethënës kur krahasohet me të dhënat e fillimvitit, kur banka qendrore raportonte një fond prej 550 tonësh. Kjo do të thotë se brenda një periudhe të shkurtër, rezervat janë pasuruar me 150 tonë të tjerë. Duke e cilësuar këtë arritje si një moment historik për institucionin, Glapinski theksoi gjatë konferencës për media se Polonia tashmë ka siguruar vendin e saj në elitën botërore të mbajtësve të arit. Vlera aktuale e këtij thesari llogaritet në 355.7 miliardë zloty, që përkthehet në rreth 80.9 miliardë euro. Në kuadër të menaxhimit të kujdesshëm dhe për të garantuar siguri maksimale, Banka Kombëtare e Polonisë ka ndarë rezervat në tri lokacione strategjike: një e treta mbahet në Nju Jork, ndërsa nga 30 për qind janë depozituar përkatësisht në Londër dhe brenda territorit polak.