Masakër në Turqi: Tetë të vrarë nga një person i armatosur, vijon operacioni për kapjen e autorit

Një ngjarje e rëndë ka tronditur provincën Afyonkarahisar të Turqisë, ku një person i armatosur ka shkaktuar vdekjen e tetë personave dhe plagosjen e rëndë të një tjetri. Autoritetet turke kanë nisur një operacion të gjerë kërkimi për të neutralizuar autorin e dyshuar, i cili po mbjell terror në lagjen Ihsaniye. Sipas të dhënave të para, autori ka vepruar në mënyrë të pamëshirshme, duke ndaluar automjete të rastit në rrugë dhe duke hapur zjarr mbi pasagjerët. Mes viktimave të këtij sulmi makabër janë identifikuar edhe dy mësuese, duke shtuar tronditjen në opinionin publik. Zbardhja e ngjarjes nisi kur forcat e sigurisë gjetën trupat e pajetë të pesë personave brenda dy automjeteve të ndryshme, në zonat e fshatrave Ayazini dhe Kıyır. Hetimet e mëvonshme dëshmuan se autori, pasi kreu sulmet e para, është zhvendosur në një tjetër zonë, ku ka ekzekutuar edhe dy persona të tjerë duke përdorur një pushkë gjahu. Prefektura e Afyonkarahisarit ka konfirmuar zyrtarisht bilancin tragjik prej tetë viktimash dhe një personi në gjendje të rëndë shëndetësore. Ndërkohë, autoritetet e sigurisë po vijojnë me intensitet hetimet për të kuptuar dinamikën e plotë të lëvizjeve të të dyshuarit dhe për të përfunduar procesin e identifikimit të të gjithë personave që humbën jetën në këtë sulm.