Manchester United kërkon arkitektin e ri: Nagelsmann dhe Emery në orbitën e 'Djajve të Kuq'

Manchester United ka nisur zyrtarisht procesin e vlerësimit të profileve të reja për stolin e skuadrës, ndërsa pozicioni i Michael Carrickut mbetet ende i paqartë dhe i mbështjellë me pasiguri. Sipas informacioneve më të fundit nga burime të afërta me zhvillimet në klub, drejtuesit e gjigantit anglez kanë zgjeruar listën e kandidatëve potencialë. Krahas emrit të Didier Deschamps, në fokusin e “Old Trafford” kanë hyrë tashmë edhe dy strategë të njohur të futbollit evropian: Julian Nagelsmann dhe Unai Emery. Nagelsmann, i cili aktualisht udhëheq përfaqësuesen e Gjermanisë, dhe Unai Emery, që po shkëlqen në krye të Aston Villës, shihen si opsione serioze nga hierarkia e klubit. Këta dy trajnerë përbëjnë shtyllat kryesore të planeve të Manchester United, nëse vendoset për një ndryshim rrënjësor në drejtimin teknik. Klubi është duke kryer një analizë të detajuar të profileve të ndryshme, me synimin për të marrë vendimin më të përshtatshëm që do të përcaktojë të ardhmen e ekipit dhe rikthimin e tij te rezultatet pozitive.